Punëtoria në Prishtinë

BIRN nis punëtoritë me Odën e Përmbaruesve Privatë dhe akterë të tjerë për të drejtat pronësore

Xheneta Murtezaj

04.6.2025 - 12:46

BIRN Kosova ka nisur ciklin e ri të punëtorive njëditore me Odën e Përmbaruesve Privatë dhe akterët e tjerë institucional që kontribuojnë në realizimin e të drejtave pronësore në Kosovë.

Qëllimi kryesor është avancimi i bashkëpunimit ndërinstitucional dhe fuqizimi i praktikave të përbashkëta, në përputhje me kuadrin ligjor dhe realitetin praktik.

Programi synon të pajisë pjesëmarrësit me njohuri, aftësi dhe qartësi profesionale mbi procesin e përmbarimit dhe ndërveprimin ndërinstitucional në fushën e të drejtave pronësore.

Punëtoritë janë duke u zhvilluar në shtatë rajonet e Kosovës. Deri tash janë zhvilluar më 02.06.2025 në Gjakovë; 03.06.2025 në Prishtinë dhe më 04.06.2025 në Ferizaj. Përderisa në ditët në vijim do të mbahen edhe në Gjilan, Pejë, Prizren dhe Mitrovicë.

Ligjërues i angazhuar për këto trajnime është Isuf Jahmurataj, profesor i Marrëdhënieve Juridike Civile.

Synimet kryesore e punëtorive janë avancimi i bashkëpunimit ndërinstitucional midis përmbaruesve dhe institucioneve të tjera relevante, si Zyrat e Kadastrit, Noteri, Ndërmjetësimi, Gjykatat dhe Administratat komunale; të thellojë njohuritë mbi procedurat përmbarimore dhe dokumentet ligjore relevante – përfshirë titujt ekzekutiv, dokumentet noteriale, marrëveshjet e ndërmjetësimit dhe vendimet për pronat, etj.

Ky aktivitet pason menjëherë pas 7 punëtorive, secila njëditore, që u mbajtën gjatë muajit maj më Odën e Noterëve dhe akterë të tjerë nën ligjerimin e Bashkim Preteni, profesor i së Drejtës Noteriale dhe Kontraktore në Fakultetin Juridik. Gjatë këtyre punëtorive mbi 110 pjesëmarrës i janë përgjigjur pozitivisht ftesës për të kontribuuar diskutimit për çështjet e pronave.

Projekti Nisma për të Drejtën e Pronës (NDP), zbatohet nga Qendra e Trajnimeve dhe Burimeve për Avokim (ATRC), bashkë-zbatohet nga BIRN Kosova dhe financohet nga Banka Botërore/ Fondi për Paqe dhe Shtet-Ndërtim. NDP, synon të adresojë nevojën kritike për përmirësimin e qasjes në informacionin për regjistrimin e tokës dhe pronës, si dhe ofrimin e shërbimeve të këshillimit në lidhje me të drejtat pronësore për gratë, të rinjtë dhe personat e cenueshëm në Kosovë.

Aktivitetet e projektit do të ndihmojnë në përmirësimin e kushteve socio-ekonomike për zhvillim të qëndrueshëm dhe paqësor, duke ndihmuar komunitetet me dokumentacionin e nevojshëm dhe të mbështetur ligjërisht për forcimin e sigurisë së të drejtave mbi tokën/pronën, duke ofruar një mundësi për pjesëmarrjen e tyre në ekonominë më të gjerë dhe duke vendosur bazat për një shoqëri më të barabartë.