Kurti pret në takim kryetarin e IRDK-së, Elbert Krasniqin, diskutuan për formimin e Qeverisë se re

Kryeministri Albin Kurti ka pritur në takim ministrin e Administrimit të Pushtetit Lokal dhe kryetarin e partisë Iniciativa e Re Demokratike e Kosovës (IRDK), Elbert Krasniqi, sot, më 02.04.2025.

Në këtë takim është diskutuar mbi formimin e Qeverisë së re pas certifikimit të rezultatit të zgjedhjeve të 9 shkurtit, njofton Zyra e Kryeministrit.

Ky takim është në vazhdën e takimeve që po zhvillon Kurti me partitë politike të pakicave për formimin e Qeverisë se re.

Pjesë e këtij takim ishte edhe anëtari i partisë IRDK, Fridon Lala.

Kryeministri Kurti e ka falënderuar Krasniqin për bashkëpunimin e ngushtë gjatë këtij mandati qeveritar dhe punën e zhvilluar.

Ndërsa, kryetari i IRDK-së, Elbert Krasniqi, në këtë takim ka konfirmuar edhe njëherë gatishmërinë e plotë për vazhdimin e këtij “bashkëpunimi të frytshëm” si dhe mbështetjen ndaj kryeministrit Kurti në formimin e Qeverisë së re.

Sot, më 02.04.2025, kryeminstri Kurti ka zhvilluar edhe një takim me zëvendëskryeministren e tretë për Çështje të Pakicave dhe të Drejtat e Njeriut, njëherësh kryetaren e Partisë së Re Demokratike (NDS), Emilija Rexhepi.

Kurti vazhdimisht është shprehur që Qeverinë do ta formojë me partitë e komuniteteve joshumicë.

Kreu i LVV-së Albin Kurti po synon që Qeverinë ta formojë pa bashkëpunuar me partitë opozitare. Mirëpo, edhe pse janë certifikuar zgjedhjet, Kurti nuk ka pranuar të japë përgjigje se si do të arrijë t’i bëjë 61 deputetë për ta formuar Qeverinë.

Në bazë të rezultateve të zgjedhjeve të 9 shkurtit 2025 posti i kryetarit të Kuvendit i takon LVV-së.

Sipas rezultateve të certifikuara, Lëvizja Vetëvendosje ka marrë 42.30% të votave, duke i siguruar 48 deputetët në Kuvend, Partia Demokratike e Kosovës ka marrë 20.95% të votave apo 24 deputetë, Lidhja Demokratike e Kosovës me 18.27% apo 20 deputetë dhe koalicioni AAK-NISMA 7.06% apo 8 deputetë.

Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.

10 deputetët e tjerë do të jenë nga komunitetet e tjera joshumicë.

Dy deputetë i ka Kosova Demokratik Turk Partisi dhe me nga një deputet janë partitë: Iniciativa e Re Demokratike e Kosovës, Nova Demokratska Stranka, Socijaldemokratska Unija, Partia Liberale Egjiptiane, Koalicija Vakat, Partia e Ashkalinjve për Integrim, Jedinstvena Goranska Partija dhe Partia Rome e Bashkuar e Kosovës.