Grenlanda formon Qeveri uniteti para vizitës së zëvendëspresidentit Vance

Deputetët e Grenlandës janë pajtuar të enjten – sipas kohës lokale – që të formojnë një Qeveri të re, duke u bërë bashkë pas presionit dhe kërcënimeve të rishprehura nga presidenti amerikan Donald Trump, për aneksimin e popullit arktik i cili është nën kurorën daneze – raporton televizioni informativ Euronews.

Katër prej pesë partive të legjislaturës së re grenlandeze të dalë prej Zgjedhjeve të këtij muaji janë pajtuar që të formojnë një Qeveri koalicioni, që do ta ketë përkrahjen e 23 prej 31 mandateve parlamentare. Marrëveshja pritet të nënshkruhet të premten, më 28.03.2025, kanë raportuar mediat vendase.

Marrëveshja është arritur pas ashpërsimit të sërishëm të gjuhës së Trumpit dhe intensifikimit të përpjekjeve të Administratës së tij për ta marrë kontrollin e ishullit arktik “në një formë, a në një tjetër”.

Zëvendëspresidenti amerikan, JD Vance pritet të arrijë të premten në Grenlandë. Ai do të vizitojë gazën ajrore amerikane Pituffik, ku kryhet monitorimi raketor dhe operacionet e Mbrojtjes. Bashkë me të do të jetë edhe gruaja e tij, Usha Vance.

Ishte menduar se Usha do ta vizitonte e vetme Grenlandën, por Vance ka thënë se ka ndërruar mendje dhe do ta shoqërojë që ajo “të mos bëjë qejf veç vetë”.

Jens-Frederik Nielsen, lider i partisë Demokraatit – më e madhja në Parlament, ka ngulmuar që të ketë Qeveri me mbështetje të gjerë politike. Prej fitores së partisë së tij të qendrës së djathtë në Zgjedhjet e 11 marsit, Nielsen ka argumentuar se një koalicion i madh është urgjent për t’i rezistuar presionit amerikan.

Kryeministri grenlandez, Mute Bourup Egede e ka dënuar udhëtimin e Vancet – duke e quajtur “tepër agresiv”.

Përgatiti: Rexhep Maloku – Kallxo.com