Gashi: Unë nuk e di një zyrtar të Qeverisë që ka dalë prej punës për shkak që i ka dalë Raporti i Progresit keq

Në edicionin e të premtes, 14.11.2025, të emisionit “Kallxo Përnime” u diskutua rreth Raportit të Progresit të Komisionit Europian për Kosovën për fushën e drejtësisë.

Kryeredaktori i Kallxo.com, Kreshnik Gashi, tha se Raporti i sivjetmë është i keq, pasi, sipas tij, po përsëriten problemet e njëjta tash e 15 vite.

Gashi theksoi se për të faji qëndron te faktori njeri dhe mosmarrja seriozisht e Raportit të Progresit.

“Problemi esencial është që sa e marrin seriozisht Raportin e Progresit institucionet tona. Unë nuk e di që një zyrtar i Qeverisë ka dalë prej punës për shkak që i ka dalë Raporti i Progresit keq. Na çka kemi problemin e parë është që nuk kemi llogaridhënie për të gjeturat e Raportit të Progresit. Çka na duhet me konstatu Raporti i Progresit pse është kaq keq sepse jemi në vitin 2025 dhe kemi probleme e riciklime që ne jemi duke i folë që 15 vjet, dhe është faji i faktorit njeri, pra është mosveprimi në raport me reformat që duhet për secilën fushë. Nëse shkon në institucion për planin e veprimit, cilat janë veprimet konkrete pas marrjes së Raportit të Progresit. Këtë plan nuk mundesh me e gjetë”- tha ai.

Gashi ka përmendur arsyen pse Kosova nuk po vendos radarë elektronikë nëpër rrugë.

“Ne i kemi 600 policë të trafikut që i vendosim çdo ditë në diell për me i zënë qytetarët me radarë, ndërkohë Europa ka radarët elektronikë. Ne nuk i kemi veç pse nuk e bëjmë një investim në teknologji. Kemi pare me i ble por nëse i blen pastaj kur të kalojnë njerëzit që janë të lidhur me Qeverinë, prokurorin e të tjerë duhet me i pagu tiketat. Ne e kemi problemin që faktori njeri po interferon në të gjithë zinxhirin qeverisës”- tha ai.

https://kallxo.com/lajm/cka-thot-raporti-i-progresit-per-sistemin-e-drejtesise-ne-kosove/