Franca arreston katër persona për komplot për vrasjen e kritikut të Putinit

Katër burra janë paraburgosur në Francë me dyshimin për komplot për vrasjen e një kritiku të profilit të lartë të presidentit rus, Vladimir Putin, raporton gazeta “The Times”.

Agjentët e inteligjencës thuhet se besojnë se të dyshuarit mund të jenë rekrutuar nga shërbimet sekrete ruse që në Francën jugperëndimore të zbulojnë shtëpinë e Vladimir Osechkinit në pranverën e sivjetme, para një atentati të planifikuar ndaj disidentit në ekzil.

Osechkin, 44-vjeçar, themeluesi i Gulagu.net, faqe interneti që ekspozon abuzimin dhe dhunën në burgjet ruse, ka thënë se ishte cak i “gangsterëve” dhe “vrasësve”.

Zyra kombëtare e prokurorisë antiterroriste e Francës ka bërë të ditur se katër burra të moshës ndërmjet 26 dhe 38 vjeçar po hetohen me dyshimin për përfshirje në një organizatë terroriste që planifikonte të kryente një krim. Të dyshuarit – tre nga Dagestani, republika kaukaziane që është pjesë e Federatës Ruse, tjetri shtetas francez – janë paraburgosur.

Osechkin ka thënë se njësitë franceze anti-terrorizëm i ia kanë shpëtuar jetën. “Është e qartë se nëse nuk do të kishte pasur një shërbim sigurie kaq profesional dhe kompetent, vrasësit e Putinit do të më kishin vrarë shumë kohë më parë”, i ka thënë ai agjencisë franceze të lajmeve AFP.

Ai ka falënderuar “të gjithë ata që kanë marrë pjesë në kapjen e këtyre gangsterëve, këtyre vrasësve” dhe gjithashtu “ata që punojnë për të ndaluar këto projekte të ndyra të Putinit në Europë dhe në Francë”.

Hetuesit e antiterrorizmit nisën hetimet muajin e kaluar pasi morën informacione se po kërcënohej jeta e Osechkinit.

Shtëpitë e të dyshuarve në rajonin e Parisit dhe Nantesit në Francën Perëndimore u bastisën dhe policia gjeti në telefonat e tyre filmime të shtëpisë së Osechkinit në Biarritz në bregdetin e Atlantikut, ka raportuar “Le Parisien”.

Thuhet se videot janë bërë kur të dyshuarit udhëtuan për në Biarritz në pranverën e këtij viti. Gjatë marrjes në pyetje, ata thanë se kishin ndodheshin aty për pushime dhe se u ishte kërkuar të merrnin filmimet nga dikush që nuk mund ta identifikonin. Ata pretenduan se ishin manipuluar.

Përgatiti: Rexhep Maloku – Kallxo.com