Dita e Falënderimeve, Kurti shtron drekë për Pratipattin dhe stafin e saj të Ambasadës së SHBA-së

Kryeministri në detyrë Albin Kurti ka shtruar një drekë për të Ngarkuarën me Punë në Ambasadën e Shteteve të Bashkuara në Kosovë, Anu Prattipati, dhe stafin e saj, me rastin e Ditës së Falënderimeve.

Zyra e Kryeministrit ka njoftuar se kjo drekë e përbashkët e Ditës së Falënderimeve ndërmjet zyrtarëve të Qeverisë së Kosovës dhe Ambasadës së SHBA-së tashmë është në vitin e saj të dytë, me synim që të shndërrohet në një traditë shumëvjeçare.

Dreka, sipas njoftimit, përfshiu shumë nga ushqimet që tradicionalisht shërbehen gjatë një darke të Ditës së Falënderimeve.

“Kjo festë është kremtuar në Shtetet e Bashkuara për gati 400 vjet dhe u shpall festë vjetore kombëtare nga Presidenti Lincoln në vitin 1863. Ajo ofron një mundësi të mirë për të shprehur falënderim për marrëdhëniet që ndajmë, të cilat vazhdojnë të thellohen”- thuhet në njoftim.

Marrëdhëniet me Shtetet e Bashkuara, thuhet më tej në njoftim, janë ndërtuar në vlera të përbashkëta, mirënjohje dhe respekt të ndërsjellë.

“Këtë vit, me qëllim të forcimit të raporteve tona bilaterale, kemi marrë vendim për 0% tarifa për mallrat amerikane, kemi arritur dakordim për strehimin e përkohshëm të shtetasve të vendeve të treta dhe kemi bërë prokurime të rëndësishme në fushën e mbrojtjes”- thuhet në njoftimin e ZKM-së.