Bufeja e të akuzuarit për ngacmim seksual të nxënëses në Gjakovë u mbyll kur u arrestua, pritet t’i shkëputet kontrata

Bufeja e një Shkolle të Mesme në Gjakovë është mbyllur që kur pronari i saj u arrestua nga Policia e Kosovës, më 27.03.2025, për shkak të dyshimit se ka ngacmuar seksualisht një nxënëse të kësaj Shkolle.

Ka dy ditë që Prokuroria Themelore në Gjakovë ka ngritur aktakuzë ndaj pronarit të bufesë në Shkollën e Mesme në Gjakovë, D. Ll. për veprën penale “Ngacmimi seksual”.

Mbylljen e bufesë të të pandehurit D. Ll. e ka konfirmuar për KALLXO.com, drejtoresha e Arsimit në Gjakovë, Eranda Kumnova- Baçi.

“Është e mbyllur që atë ditë që e kanë arrestu d.m.th. këtë pronarin. Bufeja nuk ka funksionu më. Dhe pritet nga Zyra Ligjore në Komunë [të Gjakovës] që të merr vendimin final për shkëputjen e kontratës” – tha Kumnova- Baçi, më 24.04.2025.

Për nxënësen që dyshohet se D. Ll. e ka ngacmuar seksualisht, Kumnova- Baçi tha se ka vazhduar shkollimin.

Kumnova- Baçi ka bërë të ditur se vetëm dy shkolla të mesme në Gjakovë kanë bufe dhe se në të dyjat operojnë kompani të ndryshme.

Prokuroria Themelore në Gjakovë ngriti aktakuzë ndaj D.Ll. më 22.04.2025. Aktakuza ndaj tij erdhi katër ditë para se të përfundojë paraburgimi prej 30-ditësh ndaj tij.

Sipas Aktakuzës, më 26.03.2025, D. Ll. në një Shkollë të Mesme në Gjakovë e ngacmoi seksualisht një të mitur duke u përfshirë në sjellje të padëshiruar verbale të natyrës seksuale ndaj së miturës – veprime këto me të cilat viktimës i ka cenuar dinjitetin dhe i ka krijuar mjedis objektivisht frikësues, degradues dhe poshtërues.

“Prokurori i Çështjes me rastin e ngritjes së Aktakuzës i ka propozuar Gjykatës që të pandehurin ta shpallë fajtor dhe të dënohet sipas Ligjit për veprën penale e cila i vihet në barrë. Gjithashtu të pandehurit t’i vazhdohet masa e paraburgimit deri në Aktgjykimin e plotfuqishëm” – thuhet në Njoftimin e Prokurorisë, më 22.04.2025.

Gjykata Themelore në Gjakovë e kishte aprovuar Kërkesën e Prokurorisë për paraburgim ndaj të pandehurit, më 28.03.2025.

KALLXO.com raportoi për arrestimin e të dyshuarit nga Policia e Kosovës, e cila bëri të ditur se rasti ka ndodhur të enjten, më 27.03.2025.

Në njoftimin e Policisë u tha se një qytetar ka raportuar se vajza e tij është ngacmuar në bufenë e Shkollës nga një person i rritur.

Në ndërkohë drejtoresha e Arsimit në Gjakovë Eranda Kumnova- Baçi kishte thënë se i dyshuari nuk është punëtor i Shkollës, por është pronar i bufesë brenda Shkollës, të cilën e shfrytëzon përmes qirasë.

“Personi i dyshuar është person i cili e mban bufenë në shkollë – bufe e cila është dhënë me Konkurs normalisht, me qera, nga Komuna e Gjakovës. Janë në disa Shkolla bufetë. Edhe sot paska shku vajza me prindin në Polici, edhe e ka paraqitur rastin”– tha Kumnova- Baçi, më 27.03.2025.