Avokati Koci thotë se një ish polic i Kosovës është ndaluar në Serbi, MPJD ende me asnjë reagim
Avokati Arianit Koci, përmes një postimi në Facebook, ka pretenduar është ndaluar Arbnor Spahiu, ish-pjesëtar i Njësisë Speciale Operative (NjSO), nga autoritetet e Serbisë dje, më 07.06.2025.
Sipas Kocit, ish-zyrtari policor është ndaluar në pikën kufitare Horgosh dhe është dërguar në qendrën e ndalimit në Kanjizë.
“Arbnor Spahiu, ish-pjesëtar i Njësisë Speciale Operative (NjSO), është ndaluar më 7 qershor nga autoritetet serbe në pikën kufitare Horgosh dhe është dërguar në qendrën e ndalimit në Kanjizë. Edhe pse ka tri vite që nuk është më pjesë e Policisë së Kosovës dhe jeton në Gjermani, ai është marrë në pyetje për rastin ‘Banjska’”, njofton Koci.
KALLXO.com ka dërguar pyetje në Ministrinë e Punëve të Jashtme dhe Diasporës në lidhje me pretendimin e Kocit, por deri në publikimin e lajmit, MPJD nuk ka kthyer përgjigje. Gjithashtu, një reagim zyrtar nga ana e ministrisë ende nuk ka.
Koci po ashtu ka thënë se është angazhuar për mbrojtjen e Spahiut , mirëpo sipas tij kjo nuk mjafton dhe për këtë ka kërkuar reagim nga Ministria e Punëve të Jashtme, Zyra Ndërlidhëse në Beograd dhe të gjitha institucionet përgjegjëse.
“Kërkoj reagim urgjent nga Ministria e Punëve të Jashtme, Zyra Ndërlidhëse në Beograd dhe të gjitha institucionet përgjegjëse” – ka thënë ai.
