Vrasjet në Vushtrri, kryetari Ferit Idrizi u bën thirrje prindërve që të merren më shumë më fëmijët
Ngjarjet tragjike që kanë ndodhur në Vushtrri kanë shtyrë autoritetet lokale që të kërkojnë shtimin e pranisë së Policisë dhe kontrollet nga forcat e rendit në shkolla dhe objekte të tjera ku ka prani të madhe të qytetarëve.
Një 19-vjeçar është vrarë më 23.03.2025 në Vushtrri nga një bashkëmoshatar i tij, i cili është kapur nga institucionet e rendit.
Pa kaluar 24 orë, një ngjarje tjetër tragjike ka ndodhur në Stanoc të Vushtrrisë. Një grua është vrarë nga një person, i cili pas kryerjes së vrasjes ka kryer vetëvrasje.
Lidhur me sigurinë publike po diskutohet në emisionin “KALLXO Përnime”.
Kryetari i Komunës së Vushtrrisë, Ferit Idrizi, u ka bërë thirrje prindërve që të merren më shumë me fëmijët e tyre.
Në emisionin “Kallxo Përnime”, Idrizi tha se nuk ka logjikë që prindi të mos e dijë ku i ka fëmijët.
“Unë mendoj që ne duhet t’i kthehemi shumë edukimit dhe arsimimit sepse baza është aty. Ndoshta duket pak kjo, por gjeneza është te edukimi. Prindërit duhet të merren më shumë me fëmijët e tyre sepse nuk ka logjikë që prindi mos ta dijë ku e ka fëmijën dhe çka bart fëmija i tij. Është krejt në rregull prindi, por pse me e pasë armën me veti? Mundet ai me shku me pi kafe, edhe ne kemi fëmijë, edhe fëmijët tanë dalin, por ne kemi shumë të rinj që dalin në orë shumë të vona”- tha Idrizi.
Kryetari i Vushtrrisë theksoi se bartja e armës tek moshat e reja është bërë dukuri, gjë që paraqet shqetësim të madh.
“Unë e kam fjalën tek të rinjtë që po bartin armë, pra bartja e armës pa leje është bërë dukuri te këto mosha dhe ky është një shqetësim shumë i madh. Unë e kam thirrë këshillin e sigurisë për bashkësi dhe Policia nuk na ka njoftuar vetëm për mënyrën se si ka ndodhë vrasja e 19-vjeçarit. Ne kemi kërku masa nga Policia dhe i kemi publiku disa rekomandime nga takimi që e kemi pasur. Ne kemi kërku nga Policia patrullime me të shpeshta dhe që të jenë edhe pa uniformë në lokale” – tha Ferit Idrizi, kryetar i Komunës së Vushtrrisë.
