Vodhi para dhe ari në vlerë prej 3 mijë euro në një shtëpi në Prizren, Policia kërkon të dyshuarin

Policia po kërkon bashkëpunimin e qytetarëve për identifikimin e një personi të dyshuar për një vjedhje të rëndë në një shtëpi në Prizren.

Policia ka publikuar fotografinë e të dyshuarit.

Sipas Policisë ai dyshohet se më datë 22.02.2025, rreth orës 19:50 ka vjedhur marrë para të gatshme si dhe stoli ari në vlerë rreth 3,000 euro, në një shtëpi në Prizren.

“Më datë 22.02.2025, rreth orës 19:50, Stacioni Policor në Prizren ka pranuar një informatë se në rrugën “Kamber Bruti” në Prizren, rreth orës 19:00, një person i panjohur është hasur duke dalë nga shtëpia e të dëmtuarit. Sipas deklaratës së të dëmtuarit, personi në fjalë – i dyshuari – ka marrë para të gatshme si dhe stoli ari nga shtëpia, me vlerë rreth 3,000 euro”- thuhet në njoftim.

Sipas Policisë, nga pamjet e kamerave të sigurisë është siguruar fotografia e të dyshuarit, mirëpo, siç thuhet në njoftim  deri më tani nuk është arritur identifikimi i tij.

“Me qëllim të ndriçimit të rastit, Prokuroria Themelore në Prizren ka lëshuar autorizim, në pajtim me nenin 76, paragrafi 2 të Kodit të Procedurës Penale të Republikës së Kosovës (KPPRK), për publikimin e fotografisë së të dyshuarit në mediume televizive dhe rrjete sociale. Kërkohet bashkëpunimi i qytetarëve për ofrimin e informatave që mund të ndihmojnë në identifikimin dhe arrestimin e tij”- thuhet në njoftim.

Policia fton qytetarët që nëse kanë ndonjë informatë apo njohuri për vendndodhjen e personit të paraqitur në fotografi, të kontaktojnë Policinë në Prizren, përmes numrit 192, në rrjetet sociale, në faqen zyrtare të Facebook-ut të Policisë së Kosovës, apo në cilindo stacion policor në vend.