Vërshohet nga uji një kat i aneksit 3 të Shkollës “Mihal Grameno” në Fushë Kosovë, anulohet mësimi për parashkollorët

Kati përdhesë i aneksit 3 të Shkollës Fillore “Mihal Grameno” në Fushë Kosovë është vërshuar nga uji.

Kjo ka shkaktuar që nxënësit e dy klasave të Shkollës Fillore “Mihal Grameno” që kanë mësuar në këtë kat të zhvendosen në klasat në një kat më lartë.

Lajmin e ka konfirmuar për KALLXO.com, Sadri Emini, drejtor në aneksin 3 të Shkollës “Mihal Grameno”. Sipas Eminit, nga mëngjesi ekipi emergjent i Komunës janë duke e zbrazur ujin.

“Nuk e dimë as arsyen prej nga po na vjen ata ujë. Jemi duke e zbrazë me dy motora, jemi duke punu. Njëherë pa e zbrazë ujin nuk po e dimë se nga po vjen. Niveli [i ujit] ka ra. Vetëm parashkollorët i kam paralajmëruar mos me ardhë, se nuk kemi pasur mundësi m’iu bo zgjidhje për sot”- ka deklaruar Emini.

Emini tha se në mëngjes, rreth orës 07:30, menjëherë i ka lajmëruar prindërit që të mos bëjnë panik, nxënësit janë të sigurt dhe nuk rrezikohet asgjë.

Njoftimin e drejtorisë te prindërit e ka siguruar KALLXO.com dhe në të thuhet: “Drejtoria e shkollës ju njofton se pas reshjeve të shumta që kanë përfshirë gjithë vendin, edhe në objektin tonë shkollor gjatë natës ka depërtuar ujë në katin përdhes. Organet kompetente janë njoftuar dhe tashmë ndodhen në vendngjarje. Nxënësit janë të sigurt në katin e parë, ku procesi mësimor po zhvillohet normalisht”.

Kur u pyet nëse është dëmtuar shkolla nga uji, Emini tha se në atë kat kanë pasur banka, karrige që mund të jenë prekur. 

Fatlum Berisha, drejtor i Arsimit në Fushë Kosovë tha për KALLXO.com se është në dijeni për këtë rast dhe sipas tij, ka ndodhur për shkak të reshjeve të mëdha të shiut.

Berisha e konfirmoi se vetëm ky objekt është prekur nga reshjet e shiut, kurse në shkollat tjera në Fushë Kosovë është duke u zhvilluar mësimi.

“Drejtori është duke u marrë prej mëngjesit, edhe zyrtarët e Shërbimeve Publike kanë filluar menjëherë. Por, derisa të pastrohet situata, së pari me dit se nga ka ardhë dhe tani me këqyr se çfarë dëmi është bërë” – ka thënë Berisha.

Në anën tjetër, një ditë më parë filluan reshje të mëdha të shiut në Kosovë. Emini tha se të martën, më 18.11.2025, nuk kanë pasur problem dhe mësimi ishte zhvilluar në të gjitha klasat.

Në aneksin 3 të Shkollës “Mihal Grameno” janë 1,130 nxënës të klasave 1-5, kurse 120 nxënës janë në nivelin parashkollorë.

Po ashtu sot, më 19.11.2025, në të gjitha shkollat e komunës së Vitisë është ndërprerë mësimi. Ky është vendimi i Komiteti Komunal për Mbrojte dhe Shpëtim në Viti, i cili u mor në një takim të këtij Komiteti të thirrur nga kryetari Sokol Haliti.

https://kallxo.com/lajm/permbytjet-nga-reshjet-e-shiut-ne-viti-nderpritet-mesimi-ne-te-gjitha-shkollat/

Reshjet e mëdha bën që edhe Komuna e Prishtinës ta anulojë mësimin në të gjitha shkollat vetëm për ditën e djeshme – 18.11.2025.

https://kallxo.com/lajm/anulohet-sot-mesimi-ne-komune-te-prishtines-per-shkak-te-reshjeve-te-medha-te-shiut/