Vërmicë, Dogana e Kosovës gjen afër 300 kilogramë eksploziv në bagazhin e një automjeti

Zyrtarët doganorë të Kosovës në pikëkalimin kufitar në Vërmicë më 23.11.2025 gjatë kontrollit të një automjeti kanë gjetur eksploziv me peshë të përafërt rreth 300 kilogramë.

Sipas njoftimit, eksplozivi ishte vendosur në disa thasë dhe pako, të fshehura në bagazhin e automjetit dhe të kamufluara me pajisje peshkimi.

“Gjatë intervistimit, pala ka deklaruar se nuk posedon mallra për deklarim. Megjithatë, gjatë kontrollit është hasur në mallra të padeklaruara, përkatësisht mallra të ndaluara dhe të rrezikshme (eksploziv), të vendosura në disa thasë dhe pako, me peshë të përafërt rreth 300 kilogramë, të cilat ishin të fshehura në bagazhin e automjetit dhe të kamufluara me pajisje peshkimi”- thuhet në njoftim.

Tutje është bërë e ditur, se malli është ndaluar, ndërsa ndaj palës është iniciuar procedurë për kundërvajtje doganore, sipas dispozitave të Kodit Doganor dhe të Akcizave të Kosovës (KDAK).

“Rasti i është dorëzuar Policisë Kufitare, e cila po vazhdon me veprimet e mëtejshme ligjore”- thuhet tutje në njoftim.

Dogana e Kosovës mbetet plotësisht e angazhuar në parandalimin e çdo forme të kontrabandës dhe në mbrojtjen e qytetarëve nga mallrat e rrezikshme. Përmes bashkëpunimit të vazhdueshëm dhe efektiv, ajo do të vazhdojë me vendosmëri zbatimin e ligjit dhe garantimin e integritetit dhe interesave të Republikës së Kosovës.