Shef i shtabit të ushtrisë izraelite pro-pranimit të marrëveshjes për pengjet

Shefi i shtabit të Forcave Mbrojtëse të Izraelit (IDF) ka thënë se ka një “ujdi në tavolinë” për lirimin e pengjeve të mbetura në Gazë, citon BBC të kenë raportuar mediat izraelite.

Gjenerallejtnant Eyal Zamir raportohet të ketë thënë se ushtria izraelite ka mundësuar kushtet për një ujdi, dhe se tani është në “duart e (Benjamin) Netanyahut”, kryeministrit izraelit, raporton “Channel 13 News”.

Kabinetit izraelit i sigurisë pritet të mblidhet të martën dhe ta diskutojë propozimin më të fundit të sjellë prej ndërmjetësve rajonalë, të cilin “Hamasi” e ka pranuar para një jave.

Këto zhvillime pasojnë demonstratat masive më herët gjatë muajit në Izrael me qindra mija persona të mbledhur në Tel-Aviv, duke bërë thirrje që t’i jepet fund luftës në Gazë dhe që të sigurohet një marrëveshje për lirimin e pengjeve që ende po mbahen nga “Hamasi”.

Forumi i Familjeve të Pengjeve dhe të Zhdukurve ka thënë se Zamiri ka ngritur zërin për atë “çfarë shumica e izraelitëve po kërkojnë”, përfshirë një ujdi për lirimin e 50 pengjeve të mbetura, prej të cilave 20 raportohet se ende janë gjallë, dhe që t’i jepet fund luftës.

Grupi po planifikon një tjetër ditë me protestë masive të martën.

Me propozimin më të fundit prej ndërmjetësve nga Katari dhe Egjipti thuhet se është i bazuar në kornizën e propozuar nga emisari amerikan, Steve Ëitkoff, në qershor.

Sipas ujdisë eventuale, “Hamasi” do të lironte pengjet në dy runde gjatë një armëpushimi fillestar prej gjashtëdhjetë ditësh. Ndërkohë do të zhvilloheshin bisedime për armëpushim të përhershëm.

Kabineti i Netanyahut ka thënë më parë se do të pranonte vetëm një ujdi që parasheh lirimin e përnjëhershëm të të gjitha pengjeve izraelite.

Ndërkohë Izraeli ka vazhduar në fundjavë ta bombardojë nga ajri dhe toka Qytetin e Gazës para nisjes së ofensivës së re të planifikuar.

Përgatiti: Rexhep Maloku – Kallxo.com