Rama reagon pas përleshjes që dyshohet se ndodhi në ambientet e Komunës së Prishtinës

Kryetari i Prishtinës, Përparim Rama, ka reaguar rreth përleshjes që dyshohet se ka ndodhur në ambientet e Komunës së Prishtinës sot, më 24.09.2025. 

Përmes një shkrimi në rrjete sociale, Rama e ka konsideruar këtë incident të papranueshëm dhe të dënueshëm. 

Ai është shprehur se pret që organet e drejtësisë ta trajtojnë këtë rast me përgjegjësi. 

“Dhuna që ka ndodhur sot para objektit të Komunës së Prishtinës është plotësisht e papranueshme dhe e dënueshme. Institucionet publike duhet të mbesin hapësira të dialogut e bashkëpunimit, jo të përplasjeve”- shkruhet në reagimin e tij. 

Në këtë incident dyshohet se pjesëmarrës kanë qenë kryesuesi i Kuvendit Komunal të Prishtinës, Fehmi Kupina, dhe asamblisti i Lidhjes Demokratike të Kosovës, Sami Salihu. 

Raporotohet se përleshja ka ndodhur pas përfundimit të mbledhjes së jashtëzakonshme për miratimin e buxhetit komunal. 

Ndërsa, Policia ka konfirmuar se në rrugën “UÇK” në Prishtinë ka ndodhur një rrahje sot paradite.

Zëdhënësi i Policisë së Kryeqytetit, Enis Pllana, ka thënë për KALLXO.com se për këtë rast, Policia ka shoqëruar tre persona, të cilët dyshohen se janë të përfshirë në ngjarje.

KALLXO.com ka tentuar të kontaktojë Kupinën dhe Salihun, të cilët dyshohet se kanë qenë të përfshirë në këtë përleshje, mirëpo asnjëri deri më tash nuk ka qenë i qasshëm përmes telefonit.

Po ashtu, KALLXO.com ka kontaktuar edhe Komunën e Prishtinës për të marrë një sqarim zyrtar, mirëpo Komuna ende nuk ka kthyer përgjigje.

https://kallxo.com/lajm/dyshohet-per-rrahje-ne-komunen-e-prishtines-asamblistet-pretendojne-se-u-perfshi-fehmi-kupina-e-sami-salihu/