Premtimi i Xhafer Gashit: Do të ndërtojmë pishinë gjysmë-olimpike që do t’u dedikohet nxënësve
Kandidati për kryetar të Komunës së Obiliqit nga Iniciativa Qytetare për Obiliq, Xhafer Gashi, në “Debat Përnime” ka dhënë disa premtime për investime kapitale nëse arrin të fitojë edhe një mandat nga balotazhi përball kandidatit të Lëvizjes Vetëvendosje.
“Për investime kapitale i kemi për vitin e ardhshëm mbi 5 milionë euro. Janë të ndara në kategori, duke filluar nga arsimi, shëndetësia, ambienti, infrastruktura, shërbime publike. Ne mendojmë se ndër projektet kapitale që do të jenë vitin e ardhshëm është zgjerimi i sheshit “Dëshmorët e Kombit”, deri te pjesa e parkingut që ka qenë dikur, më pas do të rrënohet edhe Posta do të shëndrrohet në shesh, pastaj një shkollë e vjetër që është pranë komunës, do të rrënohet dhe shndrrohet në parking trekatësh, meqë ajo zonë është e frekuentuar”, tha Gashi teksa shtoi se do të vazhdojnë edhe me projektet për ndriçimin publik dhe staza për biçiklistë.
Kryetari aktual, Xhafer Gashi, premtoi edhe ndërtimin e një pishine gjysmë-olimpike të dedikuar për nxënësit.
“Do të ndërtojmë një pishinë gjysmë-olimpike që do të jetë në shfrytëzim të nxënësve sepse nga përvojat e perëndimit flet se noti është pjesë e jetës që duhet ta kenë nxënësit dhe sportdashësit”, tha ai.
Kandidatët e partive politike, të cilët synojnë të marrin udhëheqjen e Obiliqit diskutojnë në “Debat Përnime” për balotazhin e 14 nëntorit.
Të ftuar në emision janë kandidatët që kanë shkuar në balotazh në Obiliq: Xhafer Gashi nga Iniciativa Qytetare për Obiliq dhe Halil Thaçi nga Lëvizja Vetëvendosje.
Sipas rezultateve përfundimtare të KQZ-së, kandidati i IQO për kryetar të Obiliqit, Xhafer Gashi, në rundin e parë të zgjedhjeve më 17 tetor ka marrë 5 mijë e 975 vota apo 48,12 për qind. Kurse kandidati i LVV-së, Halil Thaçi, ka siguruar 2 mijë e 507 vota apo 20,19 për qind.
