“Një botë për të gjithë” – Ekspozitë që pasqyron jetën e personave me Sindromën Down

Në ambientet e “Shtëpisë së Evropës” në Prishtinë, të enjten më 16.10.2025, është hapur ekspozita fotografike “Një botë për të gjithë”, e autorit Xhemail Sllovinja, e cila sjell një rrëfim të veçantë për jetën dhe përditshmërinë e personave me Sindromën Down.

Ekspozita do të qëndrojë e hapur deri më 31.10.2025, është organizuar në kuadër të muajit të ndërgjegjësimit për Sindromën Down dhe bart mesazhin sensibilizues “Çka po bën ti për neve?”.

Përmes objektivit të tij, autori Sllovinja sjell më shumë se fotografi – ai sjell jetë.

Çdo imazh është një pasqyrë e përditshmërisë, pasioneve, sfidave, buzëqeshjeve dhe përqafimeve të fëmijëve, të rinjve dhe të rriturve me Sindromën Down, duke na ftuar të reflektojmë mbi diversitetin njerëzor dhe rëndësinë e përfshirjes shoqërore.

Personazhet e përfshira në fotografitë e ekspozitës janë nga mosha 1 deri në 40 vjeç, duke dëshmuar se dashuria, energjia dhe potenciali nuk kanë kufij.

Naile Dema, gazetare, u shpreh se kjo ekspozitë është një reflektim që secili prej nesh duhet ta bëjë – mbi jetën, pranimin dhe fuqinë e dashurisë.

“Përmes kësaj ekspozite Sllovinja nuk po na ofron thjesht një ekspozitë më shumë, por përmes imazheve do ta njohë me përditshmërinë, jetën e fëmijëve të njerëzve me sindormën Down, e në fakt do të na njoh me buzëqeshje e tyre, mbi të gjitha do na njohë, gjithashtu me përqafimet, pasionet, me sfidat edhe me gëzimet që i kanë në baza ditore këta fëmijë, jo vetëm fëmijë, ka edhe të rritur”, u shpreh gazetarja Naile Dema gjatë hapjes së ekspozitës.

Ndrësa, Sebahate Hajdini Beqiri, drejtoreshë e Shoqatës “Down Syndrome Kosova”, tha se kjo ekspozitë është më shumë se një koleksion fotografish.

Sipas saj, përmes këture fotografive pasqyrohet përditshmëritë e fëmijëve tanë, të rinjve dhe të rriturve me sindromën Down.

“Ky rrëfim vizual na ndihmon të rrisim vetëdijen që këta persona mund të japin shumë për shoqërinë tonë, nëse u jepet mundësia dhe mbështetja e duhur. Këto fotografi do të kontribuojnë në ngritjen e vetëdijes që ky grup i qytetarëve mund të jetë kontribut-dhënës për shoqërinë, mund të kryej shumë aktivitete të mira për shoqërinë nëse iu jepet mundësia edhe nëse mbështetën”- tha Hajdini Beqiri.

Kjo është ekspozita e parë e Sllovijnës dhe ai vet e konsideron këtë përvojë si të paharrueshme.

Ai ka shprehur mirënjohje për familjet dhe personazhet që u bënë pjesë e këtij rrëfimi vizual.

“Kam dashur që përmes fotografisë të sjell jetën reale të këtyre personave – hobet, terapitë, aktivitetet ditore dhe momentet e tyre të veçanta. Ndihem jashtëzakonisht i lumtur që ekspozitën e parë ia kam dedikuar atyre,” – u shpreh Sllovinja.

Ekspozita “Një botë për të gjithë” do të qëndrojë e hapur deri më 31 tetor në “Shtëpinë e Evropës”.