Nis numërimi i votave për kandidatë për anëtarët e Kuvendit Komunal të Mitrovicës së Jugut

Rreth orës 17:30 ka filluar numërimi i votave në qendrën komunale të numërimit në Mitrovicë të Jugut.

Fillimisht për kryetarë dhe më pas do të vazhdojë për kandidatët për Kuvendin Komunal.

Bajram Hajdari nga Komisioni Komunal Zgjedhor tha se pret që çdo gjë të shkojë në mënyrën më të mirë të mundshme.

“Materialet i kemi pranuar në 03:00 të mëngjesit. Edhe me materialet teknike dhe logjistike jemi në rregull. Në aspekin teknik gjithçka është në rregull. Janë 10 tavolina numërimi, secila tavolinë nga 10 numërues. Për secilën tavolinë nga një vëzhgues, nga subjekti përkatës politik”- theksoi Hajdari.

Bazuar në rezultatet preliminare të publikuara nga KQZ, PDK prin me 40.43 për qind të  votave, LVV me 22.67 për qind, Partia Guxo 12.89 për qind dhe LDK me 11.94 për qind.

Gara për Mitrovicën mbetet tejet e ngushtë, ku Arian Tahiri nga PDK dhe Faton Peci nga LVV presin të përballen në balotazh.

Në bazë të të dhënave preliminare të Komisionit Qendror të Zgjedhjeve, PDK prin me 47.89 për qind, ndërsa LVV e ndjek nga afër me 47.80 për qind.

Kryetari i Lëvizjes Vetëvendosje, Albin Kurti, në një konferencë për media ka kërkuar hetime për Exit Poll-et e publikuara për garën për kryetar të Mitrovicës së Jugut.

Ai ka ftuar organet e drejtësisë dhe sigurisë që të merren me këtë çështje.

Në Mitrovicë, sipas Exit Poll-it të publikuar në orën 19:00, Arian Tahiri i PDK-së ishte renditur i pari me 55.9%, ndërsa kundërkandidati i tij, Faton Peci i LVV-së me 39.7%.

E situata ndryshoi më vonë kur doli se kandidatët e këtyre subjekteve politike do të përballen në balotazh.