Nis lëvizja e 200 trupave amerikane që do ta monitorojnë armëpushimin në Gazë

Televizioni britanik, BBC, ka raportuar të premten (10.10.2025) se kanë nisur të qarkullojnë disa informacione tashmë për forcën shumëkombëshe që do të monitorojë zbatimin e marrëveshjes ndërmjet Izraelit dhe “Hamasit” sipas planit prej 20 pikash të presidentit amerikan, Donald Trump, për t’i dhënë fund luftës në Lindje të Mesme.

BBC raporton se 200 trupa, që tashmë ndodhen në baza në Lindje të Mesme, do të lëvizin drejt Izraelit për të koordinuar operacionin, kanë bërë të ditur zyrtarët amerikanë.

Ushtria amerikane do të themelojë atë çfarë e ka quajtur qendër civilo-ushtarake koordinimi në Izrael, duke përfshirë 200 ushtarë. Bashkë me të do të ketë edhe forca nga vendet arabe dhe myslimane, përfshirë Egjiptin, Katarin dhe Turqinë, që do të monitorojnë zbatimin e armëpushimit dhe do të raportojnë për çfarëdo shkelje të tij.

Zyrtarët amerikanë htonë se asnjë ushtar amerikan nuk do të futet në Gazë. Taskforca  prihet prej Komandës Qendrore të vendosur në rajon dhe ka për synim të monitorojë përparimin e marrëveshjes së armëpushimit dhe gjithashtu do të merret me koordinimin e ndihmës humanitare.

Në pritje të këmbimit të të burgosurve dhe pengjeve, zyrtarët thonë se qëllimi i pastajmë është për krijimin e të ashtuquajturës Forca Ndërkombëtare e Stabilizimit, por për këtë pikë ende kërkohet dakordimi i palëve.

Përgatiti: Rexhep Maloku – Kallxo.com