Nga 160 çerdhe të premtuara në një mandat, sipas Nagavcit deri më tani janë 4 çerdhe të përfunduara

Në konferencën për media të thirrur nga Ministria e Arsimit lidhur me ndërtimin e çerdheve të reja, ministrja Arbërie Nagavci tha se për vitin e ardhshëm, në 14 komuna të vendit do të fillojë ndërtimi i tyre.

“Ne tashmë për vitin 2024 kemi parashikuar për së paku 14 komuna ndërtimin e çerdheve”- tha Nagavci.

Përderisa siç tregoi ajo vetëm gjatë kësaj jave do të vendosen gurë themelet e tri çerdheve të reja në Podujevë, Deçan dhe Prizren.

Tutje gjatë prezantimit për ndërtimin e çerdheve për periudhën e vitit 2021-2023, sipas ministres  gjatë kësaj periudhe në 24 komunat e Kosovës janë 4 çerdhe të përfunduara, 26 çerdhe janë në proces të ndërtimit, janë bërë 6 adaptime të shkollave dhe renovime të çerdheve dhe 8 çerdhe janë në proces të tenderimit.

Sipas Nagavcit nga marrja e mandatit të tyre numri i çerdheve në komunat e Kosovës është rritur dukshëm.

“Kemi diku 85% më shumë çerdhe në proces të ndërtimit ose të ndërtuara për periudhën 2021-2023 sesa në periudhën  2003-2020” – tha tutje Nagavci.

Ajo shtoi se për ndërtimin e çerdheve të reja ka buxhet të mjaftueshëm, mirëpo sipas saj ata kanë probleme me mungesë të përcaktimit të lokacionit nga komunat.

“Ne kemi buxhet të mjaftueshëm në dispozicion, na nevojitet që komunat të identifikojnë lokacionet”- tha ministrja.

Qeveria Kurti kishte premtuar ndërtimin e 160 çerdheve në vend gjatë mandatit 4-vjeçar.

Aktualisht në pushtet qeveria ka shënuar gati 3 vjet.

(Ky tekst është edituar me kërkesë të Ministrisë së Arsimit në pjesën ku ministrja flet për përqindjen (850%) dhe është korrigjuar me 85%)