MPJD njofton për vdekjen e shtetasit të Kosovës në Aleksinac të Serbisë

Ministria e Punëve të Jashtme dhe Diasporës (MPJD) ka njoftuar se ka pranuar raportimet zyrtare lidhur me vdekjen e Selim Vocës, shtetasit të Kosovës, pas një aksidenti me tren në qytetin Aleksinac, në Serbi.

Sipas Ministrisë, Voca ishte raportuar si person i zhdukur nga gruaja e tij më 19.11.2025, në stacionin policor në Mitrovicë të Jugut. 

“Sipas informatave zyrtare, trupi i pajetë i të ndjerit aktualisht ndodhet në Spitalin e Nishit. MPJD bën të ditur se, në koordinim me institucionet relevante të Republikës së Kosovës, është angazhuar për të mundësuar kthimin sa më të shpejtë të trupit të të ndjerit në Kosovë.” – njofton MPJD, më 21.11.2025.

Kurse, thuhet se Zyra Ndërlidhëse e Republikës së Kosovës në Serbi është në komunikim të vazhdueshëm me familjarët e viktimës dhe me autoritetet përkatëse, me qëllim të ofrimit të asistencës së nevojshme në kuadër të kompetencave të saja dhe të lehtësimit të të gjitha procedurave të kërkuara.

“Ministria e Punëve të Jashtme dhe Diasporës siguron se institucionet e Republikës së Kosovës do të ndërmarrin të gjitha veprimet e nevojshme për trajtimin e rastit me seriozitetin dhe urgjencën e duhur.” – kanë theksuar nga MPJD.