Krimet e luftës në zonën e Istogut, dëshmitari rrëfen ato që përjetoi ai dhe bashkëfshatarët nga të akuzuarit

Në Gjykatën e Prishtinës në gjykimin ndaj dy të akuzuarve për krime lufte, Momir Pantiq edhe Zharko Zariq, në seancën e sotme, 28.08.2025, ka dëshmuar dëshmitari Nexhmedin Pepaj.

Sipas aktakuzës, Momir Pantiq, në kohën kur janë kryer krimet ka qenë kryeshef i Stacionit Policor në Istog, kurse Zharko Zariq ka qenë polic. Ata akuzohen se në bashkëkryerje e kanë kryer veprën penale – krime lufte kundër popullsisë civile.

Dëshmitari Nexhmedin Pepaj dha detaje lidhur me ditën kritike.

“Në cilin vit më ke parë me uniformë, dhe kur?” – e pyeti dëshmitarin i akuzuari Momir Pantiq.

“Nëse është fjala për ditën kritike ky s’ka qenë me uniformë hiç, ky ka qenë me rroba civile. Kam deklaru edhe shumë herë po deklaroj edhe tash: pas rrahjes së vëllait në vitin 1990 familja ime është bastisur edhe shumë herë nga personat e Istogut, edhe më ka thirrë në bisedë informative shumë e shumë herë, edhe ka pasë raste shpeshherë që e kam pa me uniformë. Thirrshin në biseda informative, kërkonin armë, hynin për bastisje me dhjetëra herë brenda 10 viteve… Të dy e dinë këta” – tha Pepaj.

Dëshmitari Pepaj tha se ka ardhur në Gjykatë për të dhënë dëshminë e tij e për të kërkuar drejtësi për vëllanë e tij.

“Unë kam ardhë me lyp drejtësi për vëllanë që ma ka rrehë. As sot s’e di për çka, çka i bani që e çoi në atë gjendje buzë vdekjes. Ai vuajti për shëndet për 10 vite, pa asnjë shkak” – tha Pepaj.

“Këta e ka ditur edhe Momir Pantiqi” – tha Pepaj tutje.

Dëshmitari rrëfeu se si i kishin nxjerrë prej shtëpive, se ua kishin thyer dhëmbët, i kishin rrahur, po ashtu i kishin tërhequr zvarrë dhe se prezent kishte qenë edhe Pantiqi.

Ndërsa i akuzuari Momir Pantiq iu drejtua dëshmitarit me fjalë: “Le të mbetet në ndërgjegjen tënde se unë nuk kam marr pjesë në asnjë bastisje”.

Mirëpo Pepaj tha se ajo çka po dëshmon në Gjykatë është e vërtetë dhe jo gënjeshtër.

Pepaj tregoi se si i kishin nxjerrë nga shtëpitë dhe se kur kishin dalë në rrugë kishte parë policë grupe-grupe. “Momir Pantiq i drejtojke nëpër dyer me dorë” – tha Pepaj.

“I nxjerrshin kushërinjtë e mi zvarrë qysh më kanë nxjerrë edhe mua. Pas meje e kanë nxjerrë edhe prindin tim 79-vjeçar. Aty na tubuan të gjithëve, kurrë nuk i harroj. Ato fjalë që po thotë “s’kam qenë unë” tash do ia dëshmoj çka ka thanë kur disa pleq lypnin ndihmë prej tij, që e njihnin e i thoshin: “Të lutemi lëshoni djemtë, mos na i merr!”. Ky në gjuhën shqipe, sepse e njeh gjuhën shqipe fort mirë, u thoshte: “Asnjë fjalë nuk du me jua ni” – tha tutje Pepaj.

Këtë fjali Pepaj tha se i akuzuari Pantiq e kishte përsëritur disa herë.

Tutje seanca vazhdoi me marrjen në pyetje të dëshmitarit Nexhmedin Pepaj nga ana e mbrojtësit të të akuzuarit Zharko Zariq, avokati Dejan Vasiq dhe nga vetë i akuzuari Zharko Zariq.

“Kur keni filluar pas lufte ta shihni Zharko Zariqin në fshatin tuaj?” – e pyeti avokati Dejan Vasiq.

“Para 10 vite mos gabofsha. Jemi kanë me mijëra njerëz, aty e kam pa për herë të parë” – tha Pepaj.

“Zharko a u kthy atëherë me jetu aty?” – ishte pyetja e radhës e avokatit.

“U kthy me jetu me disa serbë por jo në pronën e vet, në një pronë të fqinjit të tij” – tha Pepaj.

Dëshmitari po ashtu tha se Zharko Zariq e flet shumë mirë gjuhën shqipe.

“Shumë mirë e flet, jemi rritë në oborret e njëri – tjetrit. Si e di unë gjuhen serbe edhe ky gjuhën shqipe” – tha Pepaj.

Seanca e sotme u ndërpre pas përfundimit të dëshmisë së dëshmitarit Pepaj.

Nga Prokuroria Speciale prezent ishte prokurorja Ajshe Ferati.

Trupi gjykues në këtë çështje penale është i përbërë nga Valon Kurtaj (kryetar), Arben Hoti dhe Kushtrim Shyti (anëtarë).

Në seancën e shqyrtimit fillestar të mbajtur më 07.10.2024, në Gjykatën e Prishtinës, Pantiq e Zariq nuk e kanë pranuar fajësinë.

Çfarë thotë dosja e Prokurorisë?

Sipas aktakuzës së 1 shtatorit 2024 të pandehurit Momir Pantiq dhe Zharko Zariq akuzohen se gjatë viteve 1998-1999 në territorin e komunës së Istogut, në bashkëkryerje me pjesëtarë të tjerë të forcave policore serbe, vepruan në shkelje të rëndë të rregullave të së drejtës ndërkombëtare.

Sipas aktakuzës Momir Pantiq nën përgjegjësinë individuale dhe përgjegjësinë komanduese si kryeshef i Stacionit Policor në Istog ka kryer vrasje, torturë, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës civile të nacionalitetit shqiptar në komunën e Istogut.

I pandehuri Zharko Zariq akuzohet se në cilësinë e policit të Stacionit Policor në Istog dhe si ekzekutues i urdhrave ka kryer vrasje, torturë, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës shqiptare në Komunën e Istogut.

Aktakuzën voluminoze për këtë rast mund ta gjeni këtu.

Po ashtu të gjitha raportimet e tjera lidhur me këtë rast mund ti gjeni në këtë LINK.

Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

Ish-presidenti i Jugosllavisë Sllobodan Millosheviq ishte akuzuar për “krime lufte” dhe për “krime kundër njerëzimit”, të kryera nga forcat serbe e jugosllave në Kosovë. Millosheviq ishte akuzuar për “krime lufte” dhe “krime kundër njerëzimit”, të kryera edhe në luftërat në Bosnjë dhe Hercegovinë, si dhe në Kroaci.

Gjykimi i tij në Gjykatën Ndërkombëtare Penale për ish-Jugosllavinë (ICTY), me seli në Hagë, nuk kishte marrë epilog, pasi Millosheviq kishte vdekur më 11.03.2006 në qeli, teksa po mbahej në paraburgim.

Millan Millutinoviq, ish-Kryetari i Serbisë, ishte liruar nga akuzat për “krime lufte gjatë konfliktit në Kosovë”.

Nikolla Shainoviq, Zëvendëskryeministër i Republikës Federale të Jugosllavisë, ishte dënuar me 18 vjet burg për “krime kundër njerëzimit” dhe “shkelje të ligjeve apo zakoneve të luftës”.

Dragolub Ojdaniq, ish-Shefi i Shtabit të Përgjithshëm të Ushtrisë jugosllave, ishte dënuar me 15 vjet burg për “krime kundër njerëzimit”.

Nebojsha Pavkoviq, ish-Komandanti i Armatës së Tretë të Ushtrisë jugosllave, ishte dënuar me 22 vjet burg për “krime kundër njerëzimit” dhe “shkelje të ligjeve apo zakoneve të luftës”.

Vlladimir Llazareviq, ish-Komandanti i Korpusit të Prishtinës të Ushtrisë jugosllave, ishte dënuar me 14 vjet burg për “krime kundër njerëzimit”.

Sreten Llukiq, ish-Shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për “krime kundër njerëzimit” dhe “shkelje të ligjeve apo zakoneve të luftës”.

Aktgjykimin të plotë, në gjuhën angleze, e gjeni në këtë link.