KQZ certifikon listën e votuesve për raundin e dytë, në 18 komuna kanë të drejtë vote 1 milion e 346 mijë e 397 qytetarë

Komisioni Qendror i Zgjedhjeve ka njoftuar se ka certifikuar listën e votuesve për raundin e dytë të zgjedhjeve për kryetar komunash.

Sipas KQZ-së, zgjedhjet për kryetar do të mbahen në 18 komuna të vendit, në Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot.

“Numri i përgjithshëm i qytetarëve me të drejtë vote në raundin e dytë të zgjedhjeve në këto 18 komuna është 1,346,397 votues. Ky numër, në krahasim me raundin e parë të Zgjedhjeve Lokale të mbajtura më 12 tetor 2025, është më i lartë për 543 votues” – thuhet në njoftim të KQZ-së.

Po ashtu, institucioni që organizon zgjedhjet në Kosovë njoftoi edhe për numrin e votuesve me të drejtë vote me postë.

“Sipas të dhënave nga Lista Votuese, numri i qytetarëve me të drejtë vote në vendvotimet e këtyre komunave është 1,316,672 votues, ndërkaq numri i qytetarëve të regjistruar për të votuar me postë nga jashtë Kosovës dhe që i takojnë këtyre komunave është 29,725 votues” – thuhet në njoftim.

Në listë, sipas KQZ-së janë përfshirë edhe personat që nga data 13 tetor deri më 9 nëntor 2025 arrijnë moshën e votimit, ndërkaq janë larguar personat që nga shtatori i këtij viti kanë hequr dorë nga shtetësia e Kosovës apo që kanë ndërruar jetë.

“Raundi i dytë i zgjedhjeve do të organizohet në 525 Qendra të Votimit me gjithsej 1,648 vendvotime, prej të cilave 507 Qendra të Votimit për votimin e rregullt me 1,628 vendvotime dhe 18 Qendra të Votimit për votimin me kusht me gjithsej 20 vendvotime” – thuhet në njoftimin e Komisioni Qendror të Zgjedhjeve.

KQZ dha detaje edhe për shtypjen e fletëvotimeve.

“Sipas vendimit të KQZ-së, do të shtypen 1,158,015 fletëvotime apo rreth 16% më pak se numri i përgjithshëm i qytetarëve me të drejtë vote në këtë raund. Në këtë numër përfshihen fletëvotimet për vendvotimet e rregullta, votimin me kusht, Votimin e Personave e Nevoja të Veçanta, fletëvotimet rezervë dhe për votimin me postë” – thuhet në fund të njoftimit.