Kosova nuk do të dërgojë film për edicionin e 98-të të çmimeve “Oscars”

Kosova nuk do të paraqesë film për edicionin e 98-të të çmimeve të Akademisë Amerikane të Arteve dhe Shkencave të Filmit “Oscars”, që mbahet vitin e ardhshëm (2026) në Los Anxhelos të SHBA-së.

Kështu kanë bërë të ditur nga Qendra Kinematografike e Kosovës për KALLXO.com.

Sipas QKK-së, i vetmi film që kishte aplikuar në thirrjen e kësaj qendre të hapur më 07.07.2025 për përzgjedhjen e filmit që do të përfaqësojë Kosovën në edicionin e 98-të të çmimeve “Oscar”, në kategorinë për film ndërkombëtar/gjuhë të huaj, nuk ka bindur komitetin përzgjedhës për të përfaqësuar Kosovën në këtë garë.

QKK-ja nuk ka treguar se cili film është, por ka bërë të ditur se komiteti vlerësoi se ky film nuk e plotësonte standardin e konkurrimit për këtë garë.

“Pas shqyrtimit të aplikimit dhe rregullave të ‘Oscars’ për këtë kategori, Komiteti Përzgjedhës u mblodh më 4 shtator 2025. Pas një vlerësimi të plotë, Komiteti vendosi unanimisht që Kosova të mos paraqesë film për edicionin e ardhshëm, pasi propozimi i vetëm i pranuar nuk i plotëson standardet e konkurrimit për garën e ‘Oscars’”- thuhet në përgjigjen e QKK-së për KALLXO.com.

Komiteti përzgjedhës përbëhej nga Ares Shporta (kryesues), Adriana Matoshi, Norika Sefa, Parta Kelmendi dhe Alush Gashi.

Më 2023 dhe 2024, Kosova nuk dërgoi propozimet e saj për “Oscar” për edicionin e 96-të dhe të 97-të të këtyre çmimeve.

Edicioni i 98-të i çmimeve “Oscars” do të mbahet në mars 2026 në “Dolby Theatre” në Los Anxhelos të SHBA-së.

https://kallxo.com/kulture/qkk-hape-thirrjen-per-propozime-per-edicionin-98-te-cmimeve-oscars/