Komuna e Vushtrrisë themelon Drejtorinë për Diasporë dhe Integrime Europiane

Komuna e Vushtrrisë ka themeluar Drejtorinë e Diasporës dhe Integrimeve Europiane.

Këtë për KALLXO.com e ka konfirmuar kryetari i Vushtrrisë, Ferit Idrizi, i cili shtoi se në krye të saj e ka emëruar ish-drejtoreshën e Drejtorisë për Kulturë Rini dhe Sport, Medina Bunjakun.

“Unë ju kam premtu diasporës që do ta themeloj Drejtorinë e Diasporës dhe ai themelim është ba në mënyrë të ligjshme”-ka thënë Idrizi.

Pozitën e re si drejtoreshë e Diasporës dhe Inegrimeve Europiane e ka konfirmuar edhe vetë Medina Bunjaku.

“Jam zgjedhur të martën e kaluar (04.06.2024)– ka deklaruar shkurt Bunjaku.

I pyetur nëse ka qenë i nevojshëm themelimi i një drejtorie për disporën në këtë komunë, i pari i Vushtrrisë është arsyetuar me mundësinë e  tërheqjes së investimeve të diasporës në Vushtrri.

“Jam shumë i interesuar me i tërheqë investimet e diasporës. Po qysh nuk ka nevojë? A i kemi 40% të familjeve tona në diasporë? A  meritojnë ata me e pasë një përkushtim? Çfarë kapitali ka diaspora, ata e meritojnë me e pasë një urë lidhëse”- ka thënë Idrizi.

Ndërkaq për kalimin e Bunjakut nga Drejtoria e Kulturës në Drejtorinë e re për Diasporë, Idrizi është shprehur se arsyeja ka qenë mungesa e një performance të kënaqshme të punës së Bunjakut në këtë dikaster, ndonëse e njëjta për dy vite e gjysmë e kishte drejtuar këtë Drejtori.

“E hup besimin e qytetarëve edhe dikur i them: “Ose po ta ndërroj këtë pozitë ose po e çoj te shtëpia krejt”. Tash unë në mënyrën ma njërëzore e bëj vlerësëimin e performancës” – theksoi ai.

KALLXO.com më 17.05.2024 ka raportuar për ndërrimin e drejtorëve në tri drejtori të Komunës së Vushtrrisë.

https://kallxo.com/lajm/nderrohen-drejtoret-e-tri-drejtorive-te-komunes-se-vushtrrise-cila-eshte-arsyeja/

Më datë 17.05.2024 Medina Bunjaku kishte deklaruar për KALLXO.com se kishte dënë dorëheqje nga DKRS- ja për arsye personale.

“Po, kam dhënë dorëheqje për arsye personale, për vazhdim të studimeve të mia”- kishte deklaruar Bunjaku.

Për themelimin e kësaj Drejtorie ka pasur reagime edhe nga LDK në Vushtrri.

“Pas ankesës se në DKRS-së kishte “shumë punë”, drejtoresha e kësaj drejtorie u lirua nga detyra dhe Kryetari Ferit Idrizi, me një lëvizje gjeniale, krijoi Drejtorinë e re për Diasporë dhe Integrime Evropiane, me më pak punë për të. Kështu, Vushtrria shënon epokën e artë të administratës: kur të lodhë puna, krijohet një drejtori e re!”- thuhet në reagimin e tyre publik.

Lidhur me këtë, KALLXO.com i ka dërguar pyetje me shkrim edhe Ministrisë së Administrimit të Pushtetit Lokal (MAPL), por deri në publikimin e këtij shkrimi nuk ka pranuar përgjigje.