Komuna e Prishtinës ndalon hyrjen në qytet të autobusëve të linjave ndërurbane

Komuna e Prishtinës nuk do të lejojë hyrjen në brendi të qytetit të autobusëve të udhëtarëve të linjave ndërurbane.

Alban Zogaj, nënkryetar i Komunës së Prishtinës, ka bërë të ditur se gjatë ditës së sotme inspekcioni në mbështetje të Policisë ka zhvilluar një aksion për të mos lejuar hyrjen e autobusëve nga qytetet fqinje në brendi të qytetit.

“Drejtoria e Inspekcionit, nga sot ka nisur një aksion të gjerë nën asistimin edhe të policisë që ka për qëllim inspektimin, përkatësisht, parandalimin e futjes në brendi të qytetit të operatorëve (ndërurban) që merren me transportin e udhëtarëve nga komunat fqinje për në Prishtinë, dhe anasjelltas” – ka shkruar Zogaj në Facebook.

Nënkryetari Zogaj ka postuar edhe fotografi nga aksioni i inspekcionit për kontrollin e autobusëve të udhëtarëve që hynin në Prishtinë.