Katër të lënduarit nga aksidenti në Dollc janë liruar nga spitali, njëri vazhdon trajtimin në Kirurgji

Një nga pesë pacientwt e pranuar, po vazhdon trajtimin në Spitalin e Pejës, pas aksidentit me fatalitet në Dollc të Klinës. Ai po trajtohet në repartin e Kirurgjisë, teksa është jashtë rrezikut për jetën.

“Një pacient tjetër vazhdon të trajtohet në repartin e Kirurgjisë, ku është nën kujdesin e ekipeve tona mjekësore dhe është jashtë rrezikut për jetë.” – njoftoi Spitali i Pejës.

Në komunikatën e dytë për këtë rast, Spitali i Përgjithshëm i Pejës ka njoftuar se katër pacientet e tjerë janë liruar.

“Spitali i Përgjithshëm në Pejë njofton opinionin publik se nga pesë pacientët e pranuar pas aksidentit trafiku në fshatin Dollc të Klinës, katër kanë marrë trajtimin e nevojshëm dhe janë lëshuar në gjendje stabile shëndetësore.”- thuhet në njoftim.

Një person ka vdekur dhe pesë të tjera janë lënduar në një aksident trafiku mes një veture dhe një autobusi në fshatin Dollc të Klinës, mëngjesin e sotëm, më 21.08.2025.

Policia bën të ditur se automjetet e përfshira ishin me targa vendore.

Sipas tyre, aksidenti dyshohet se ka ndodhur pasi drejtuesi i veturës ishte duke qarkulluar në drejtimin Prishtinë-Pejë dhe pasi ka arritur në fshatin Dollc, duke mos iu përshtatur shpejtësisë dhe kushteve të rrugës, ka humbur kontrollin dhe ka goditur autobusin në pjesën ballore.

“Si pasojё e aksidentit, drejtuesi i automjetit pёr shkak tё lёndimeve trupore ka ndёrruar jetё, kёtё e ka konstatuar ekipi mjekёsor, ndёrsa lëndime trupore kanё pёsuar pesё persona, tё cilёt janё dёrguar nё spitalin rajonal nё Pejё, pёr tretman mjekёsor”- thuhet në njoftimin e Policisë.

Siç njofton Policia, me urdhër të prokurorit të shtetit, i cili po ashtu thuhet se ishte në vendin e ngjarjes, trupi i pajetë i viktimës është dërguar  në Institutin e Mjekësisë Ligjore në Prishtinë, për obduksion.

https://kallxo.com/lajm/policia-jep-detaje-per-aksidentin-me-fatalitet-ne-dollc-te-klines/