Katari: Sulmi i Netanyahut në Doha shuan shpresat për lirimin e pengjeve

Kryeministri i Katarit ka intensifikuar kritikat ndaj Izraelit për sulmin në Doha që cak kishte udhëheqësit e “Hamasit”, duke thënë se kryeministri izraelit, Benjamin Netanyahu, “mbyti ​​çdo shpresë” për lirimin e pengjeve që mbahen ende në Rripin e Gazës, raporton AP. 

Komentet e Sheikut Mohammed bin Abdulrahman Al Thani përpara paraqitjes në Kombet e Bashkuara të enjten kanë nënvizuar zemërimin e rritur në mesin e shteteve arabe të Gjirit për sulmin e Izraelit, i cili vrau të paktën gjashtë persona.

“Po takohesha me një nga familjet e pengjeve mëngjesin e sulmit”, ka treguar Sheiku Mohammed për televizionin CNN në një intervistë të transmetuar të mërkurën vonë (10.09.2025) . “Ata po mbështeten në këtë ndërmjetësim (armëpushim), nuk u ka mbetur tjetër shpresë”.

Sheiku Mohammed ka shtuar: “Mendoj se ajo që bëri Netanyahu dje, ai thjesht mbyti çdo shpresë për ato pengje”.

Katari dhe Egjipti kanë qenë ndërmjetës kryesorë për të provuar arritjen e një armëpushimi në luftën në Gazë. Katari ua ka hapur dyert udhëheqësve politikë të “Hamasit” për vite me radhë në Doha, edhe për shkak të një kërkese nga SHBA-ja për të inkurajuar negociatat midis grupit militant dhe Izraelit.

Nuk pati asnjë konfirmim të menjëhershëm të komenteve nga Netanyahu, qeveria e të cilit është përfshirë në luftëra në të gjithë rajonin që nga sulmi i “Hamasit” më 7 tetor 2023 ndaj Izraelit. Megjithatë, ai ka vazhduar të mbrojë sulmet dhe ka kërcënuar me veprime të mëtejshme kundër Katarit një ditë pasi presidenti amerikan, Donald Trump, u mundua të lehtësonte tensionet midis aleatëve të SHBA-së, duke përfshirë edhe garancinë shtetit të Gjirit se nuk do të ketë më sulme të tilla në tokën e tij.

“Unë i them Katarit dhe të gjitha vende që strehojnë terroristë, ose i dëboni ose i sillni para drejtësisë”, ka deklaruar Netanyahu. “Sepse nëse nuk e bëni ju, do ta bëjmë ne”.

Sheiku Mohammed pritej të merrte pjesë në një takim të Këshillit të Sigurimit të OKB-së më vonë të enjten, pjesë e një shtytjeje diplomatike nga Katari pas sulmit.

Sulmi në territorin e një aleati të SHBA-së ka shkaktuar dënim të gjerë nga vendet në Lindjen e Mesme dhe më gjerë. Sulmi shënoi gjithashtu përshkallëzim dramatik në rajon dhe rrezikon t’i çojë dëm bisedimet që synonin t’i jepnin fund luftës dhe të lironin pengjet që ende mbahen nga “Hamasi” në Gazë.

“Hamasi” ka deklaruar të martën se udhëheqësit e tij kryesorë e mbijetuan sulmin, porse pesë anëtarë të nivelit më të ulët u vranë, përfshirë djalin e Khalil al-Hayyas – udhëheqësi i “Hamasit” për Gazën dhe negociatori i tij kryesor – si dhe tre truproja dhe kreun e zyrës së Al-Hayyas. “Hamasi”, i cili ndonjëherë ka konfirmuar vrasjen e udhëheqësve të tij vetëm disa muaj më vonë, nuk ka ofruar prova të menjëhershme se Al-Hayya dhe figura të tjera të larta kishin mbijetuar.

Përgatiti: Rexhep Maloku – Kallxo.com