Kandidatja përdori telefonin gjatë ushtrimeve, ndëshkohet instruktorja e shoferëve

Policia e Kosovës ka ndëshkuar një instruktore të shoferëve në Ferizaj për shkak se një kandidate ishte kapur duke e përdorur telefonin gjatë ushtrimeve me të.

Të njëjtës i është shqiptuar gjoba në vlerë 200 euro, dy pikë negative dhe një masë mbrojtëse të ndalimit të drejtimit të automjetit për tre muaj.

“Gjatë lëvizjes, kandidatja është kapur në flagrancë duke përdorur telefonin celular, gjë që përbën kundërvajtje sipas Ligjit për Rregullat e Trafikut Rrugor, neni 54, paragrafi 2”- thuhet në njoftimin e Policisë së Kosovës më 21.10.2025.

Organet e rendit kanë theksuar se në këtë rast instruktores i është shqiptuar gjoba për shkak se ajo ështlë përgjegjëse për veprimet e kandidatit gjatë ushtrimeve.

Po ashtu, në njoftimin e Policisë së Kosovës bëhet e ditur që instruktorja në fjalë ka qenë e evidentuar edhe më parë për kundërvajtje të përdorimit të telefonit, “duke vepruar për herë të dytë në kundërshtim me ligjin e trafikut rrugor”.

Ky ndalim është bërë në kuadër të kontrolleve të rregullta në komunikacion. Policia ka ndaluar automjetin e auto–shkollës në rrugën “Brahim Ademi” në Ferizaj, i cili ishte duke u drejtuar nga kandidatja G.H., nën mbikëqyrjen e instruktore­s së shoferëve N.S. (51 vjeç).

Policia Rajonale e Ferizajt apelon tek të gjitha auto–shkollat dhe instruktorët e tyre që gjatë procesit të trajnimit të kandidatëve të respektojnë me përpikëri rregullat e trafikut, në mënyrë që të garantohet siguria e pjesëmarrësve në komunikacion.

Vetëm gjatë 24 orëve të fundit, Policia Rajonale e Ferizajt ka shqiptuar 14 gjoba kundërvajtëse ndaj shoferëve të cilët janë kapur duke përdorur telefonin gjatë ngasjes së automjetit.