Ish-ministri i Mbrojtjes tregon se si trajnohen pjesëtarët e FSK-së për situatat kur duhet t`i përdorin armët
Ish-ministri i Mbrojtjes, Anton Quni duke folur për incidentin e ndodhur në Shtërpcë tre ditë më parë, ka thënë se një pjesëtar i FSK-së është i tillë gjatë 24 orëve të ditës.
Ai tha se ata gjatë trajnimeve kalojnë nëpër disa programe shumë stresuese ku edhe simulojnë situata të tilla dhe mësojnë se si duhet vepruar ndaj çdo rreziku, sipas ligjit.
Se a i ka respektuar hapat dhe protokollet e FSK-së ky pjesëtar, Quni tha se duhet pritur deri në mbarimin e hetimeve.
Sipas tij, ky rast është duke u kapitalizuar nga Beogradi dhe policia e FSK-ja duhet të nxjerrë një mësim nga ky rast.
Programi i shërbimit të pjesëtarëve të FSK-së, siç tha Quni nuk është racist dhe vlen për të gjithë qytetarët e Kosovës.
32 vjeçari A.K., është arrestuar më 6 janar, pas plagosjes së dy të rinjve, njëri 11 e tjetri 21 vjeç në fshatin Gotovushë të Shtërpcës. Ndaj të dyshuarit, i cili është pjesëtar i Forcës së Sigurisë së Kosovës, Gjykata e Ferizajt i ka caktuar masën e paraburgimit për një muaj.
Sipas Prokurorisë ndaj të njëjtit rëndojnë akuza për tri vepra penale. A.K., është i dyshuar për veprat penale, “Vrasja e rëndë në tentativë”, “Përdorimi i armës apo mjetit të rrezikshëm” dhe “Shkaktimi i rrezikut të përgjithshëm”.
Kjo ngjarje ka ngjallur reagim të serbëve lokal në Shtërpcë, të cilët po atë ditë për disa orë bllokuan rrugën, ndërsa të nesërmen mbajtën një protestë.
