Gjykata e Prishtinës i cakton paraburgim një të dyshuari për krime lufte

Masa e paraburgimit është caktuar ndaj R.D, i cili dyshohet për krime lufte kundër popullatës civile.

Departamenti Special në kuadër të Gjykatës Themelore në Prishtinë, ka aprovuar kërkesën e Prokurorisë Speciale të Republikës së Kosovës dhe i ka caktuar 1 muaj paraburgim R.D.

“Gjyqtari i procedurës paraprake, pas seancës dëgjimore vlerësoj se janë përmbushur kushtet ligjore për caktimin e masës së paraburgimit për të pandehurin R.D., pasi ekziston dyshimi i bazuar se i njëjti në bashkëkryerje ka kryer veprën penale Krime lufte kundër popullatës civile” – thuhet mes tjerash në njoftimin e Gjykatës.

Më 22.05.1999 gjatë luftës në Kosovë, kur forcat serbe kishin marrë ofensivë në Vushtrri, dyshohet se R.D kishe marrë pjesë në cilësinë e pjesëtarit të Policisë serbe në kryerje të veprimeve të rrahjes, plaçkitjes së pasurisë dhe vrasjes së civilëve.

Sipas Gjykatës, në thelb këto janë veprime me të cilat plotësohen elemenetet e figurës së veprës penale “Krim i luftës kundër popullatës civile”.

“Gjykata vlerësoj se pesha e veprës penale është e natyrës së rëndë dhe komplekse, andaj caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme, për zbatimin e suksesshëm të procedurës penale” – thuhet tutje në njoftim.

Sipas Gjykatës, ekziston dyshimi i bazuar se nëse R.D gjendet në liri, mund të arratiset, kjo duke e ditë që ai është shtetas i Serbisë dhe mund të jetë i parritshëm për fazat e tjera të procedurës penale.

Kundër aktvendimit, palët e pakënaqura kanë të drejtë ankese në Gjykatën e Apelit.

Me udhër të Prokurorisë Speciale, të premten më 12.09.2025, Policia e Kosovës ka arrestuar një person të dyshuar për krime lufte.

Në një komunikatë të përbashkët të Prokurorisë Speciale dhe Policisë, thuhet se i arrestuar R.D. dyshohet se ka kryer krime luftë kundër popullatës civile, gjatë periudhës së luftës së fundit në Kosovë.

“Prokuroria Speciale, në bashkëpunim me Policinë e Kosovës, përkatësisht hetuesit nga Sektori për Hetimin e Krimeve të Luftës, është duke ndërmarrë dhe do të ndërmarrë të gjitha veprimet e nevojshme hetimore, në përputhje me Kodin e Procedurës Penale dhe legjislacionin në fuqi”- thuhet në njoftimin e lëshuar.

Në luftën e fundit në Kosovë, në vitet 1998-1999 nga forcat serbe u vranë mbi 13 mijë persona dhe mbi 800 mijë u zhvendosën. Gati 23 vjet pas luftës, të zhdukur vazhdojnë të jenë mbi 1,600 persona.

Gjykimet për krimet e luftës në Kosovë

Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

Ish-presidenti i Jugosllavisë, Sllobodan Millosheviq ishte akuzuar për “krime lufte” dhe për “krime kundër njerëzimit”, të kryera nga forcat serbe e jugosllave në Kosovë. Millosheviq ishte akuzuar për “krime lufte” dhe “krime kundër njerëzimit”, të kryera edhe në luftërat në Bosnjë dhe Hercegovinë, si dhe në Kroaci.

Gjykimi i tij në Gjykatën Ndërkombëtare Penale për ish-Jugosllavinë (ICTY), me seli në Hagë, nuk kishte marrë epilog, pasi Millosheviq kishte vdekur më 11.03.2006 në qeli, teksa po mbahej në paraburgim.

Nikolla Shainoviq, Zëvendëskryeministër i Republikës Federale të Jugosllavisë, ishte dënuar me 18 vjet burg për “krime kundër njerëzimit” dhe “shkelje të ligjeve apo zakoneve të luftës”.

Dragolub Ojdaniq, ish-Shefi i Shtabit të Përgjithshëm të Ushtrisë jugosllave, ishte dënuar me 15 vjet burg për “krime kundër njerëzimit”.

Nebojsha Pavkoviq, ish-Komandanti i Armatës së Tretë të Ushtrisë jugosllave, ishte dënuar me 22 vjet burg për “krime kundër njerëzimit” dhe “shkelje të ligjeve apo zakoneve të luftës”.

Vlladimir Llazareviq, ish-Komandanti i Korpusit të Prishtinës të Ushtrisë jugosllave, ishte dënuar me 14 vjet burg për “krime kundër njerëzimit”.

Sreten Llukiq, ish-Shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për “krime kundër njerëzimit” dhe “shkelje të ligjeve apo zakoneve të luftës”.

Aktgjykimin të plotë, në gjuhën angleze, e gjeni në këtë link.

https://kallxo.com/lajm/arrestohet-nje-person-i-dyshuar-per-krime-lufte-ne-kosove/