Gjykata e dënoi me 6500 euro policin serb që u zë duke transportuar fishekë e para të gatshme

Gjykata e Mitrovicës e dënoi me gjobë prej 6 mijë e 500 eurosh, pjesëtarin e Policisë së Serbisë, i akuzuar për transportim të fishekëve e parave të gatshme (euro e  dinarë).

Prokuroria më datë 17.11.2025 ka dorëzuar në Gjykatë aktakuzën së bashku me marrëveshjen mbi pranimin e fajësisë, të arritur në mes të pandehurit dhe Prokurorisë Themelore në Mitrovicë.

“Gjykata e ka pranuar marrëveshjen mbi pranimin e fajësisë dhe ka shqiptuar dënim me gjobë në shumën prej gjashtë mijë e pesëqind (6500) euro.”- konfirmoi Hateme Haxhaj, zëdhënëse e Gjykatës.

Polici serb i cili ishte arrestuar në Jarinje, më  02.11.2025 veçse iu kishte caktuar masa e paraburgimit në afat prej një muaji.

Mirëpo siç bëri të ditur zëdhënësja, të pandehurit me aktvendim të veçantë i është ndërprerë kjo masë me datë 20.11.2025.

E po ashtu është urdhëruar konfiskimi i përhershëm i fishekëve.

Ndryshe, më 02.11.2025 Policia bëri të ditur se në vendkalimin kufitar në Jarinjë është arrestuar i dyshuari, pjesëtar i Policisë së Serbisë, për shkak se në veturën me targa të Beogradit të cilën ishte duke e drejtuar gjatë kontrollit në bagazh i janë gjetur dhe konfiskuar 51 fishekë, 9 mijë e 900 euro dhe 26 mijë dinarë serbë.

https://kallxo.com/lajm/nje-muaj-paraburgim-per-policin-serb-qe-u-ze-duke-transportuar-fisheke-e-para-te-gatshme/