Caktohet seanca dëgjimore ndaj zyrtarit të MMPHI-së, Naser Hafizit, i cili u arrestua në Aeroportin e Prishtinës

Gjykata e Prishtinës e ka caktuar për ditën e sotshme më 11.10.2024, në ora 13:00, seancën dëgjimore ndaj Naser Hafizit, zyrtarit të Ministrisë së Mjedisit Planifikimit Hapësinor dhe Infrastrukturës, i dyshuar për keqpërdorim detyre.

Këtë për Kallxo.com e ka konfirmuar zëdhënësja e Gjykatës Mirlinda Gashi.

I njëjti po dyshohet për keqpërdorim të detyrës apo autoritetit zyrtar; shpëlarje të parave, dhe mosraportim apo raportim të rremë të pasurisë, të të ardhurave, të dhuratave, të dobisë tjetër pasurore ose të detyrimeve financiare.

Mbi bazën e këtij dyshimi Naser Hafizi është arrestuar më 10.10.2024 në Aeroportin e Prishtinës.

Të martën, më 08.10.2024, KALLXO.com raportoi se sekretari i Ministrisë së Mjedisit, Planifikimit Hapësinor dhe Infrastrukturës, Izedin Bytyqi, është arrestuar pas aksionit të Prokurorisë Speciale dhe Policisë së Kosovës në ambientet e kësaj Ministrie.

Ndaj të të njëjtit Gjykata ka caktuar masën e arrestit shtëpiak.

Ndërsa, i dyshuari i dytë, Naser Hafizi, nuk ishte gjetur në vendbanimin e tij.

Në komunikatën e PSRK-së tregohet se çka ishte gjetur gjatë bastisjeve të së martës.

“Gjatë bastisjes janë sekuestruar dëshmitë si në vijim: 1 revole e tipit MAUSER-WERKR me 2 karikator me nga 7 fishekë, dhe një kuti me 54 fishekë  9 mm, 34 fletë dokumente të ndryshme, 3 telefona, 1 IPhone 15 ProMax, 1 IPhone 12 ProMax, 1 IPhone 11 ProMax, 17 USB, 3 laptopë HP, 4 shtëpiza kompjuteri si dhe dokumente të rëndësishme për procedurën hetimore” .

Po ashtu, është lëshuar urdhër i përkohshëm ndalimi për 6 banesa, me lokacione në Prishtinë dhe Fushë-Kosovë.

Sipas njoftimit të dy institucioneve, aksioni u zhvillua pas hetimeve disamujore.