Biblioteka Kombëtare e Kosovës dhe ajo e Shqipërisë nënshkruajnë marrëveshje bashkëpunimi
22.11.2025 - 20:04
Biblioteka Kombëtare e Kosovës “Pjetër Bogdani” ka njoftuar se ka nënshkruar marrëveshje bashkëpunimi me Bibliotekën Kombëtare të Shqipërisë.
Sipas një njoftimi publik, marrëveshja mes palëve u nënshkrua në ambientet e qendrës “Sotir Kolea” më 21.11.2025.
Tutje, thuhet se marrëveshja u nënshkrua nga drejtoresha e përgjithshme e BKK-së, Blerina Rogova Gaxha, dhe drejtori i Bibliotekës Kombëtare të Shqipërisë, Piro Misha.
“Ky është një hap i rëndësishëm drejt forcimit të bashkëpunimit të deritanishëm mes dy institucioneve dhe krijimit të projekteve të reja të përbashkëta në fushën e kulturës, dijes dhe trashëgimisë”- shkruhet në njoftimin e datës 22.11.2025.
