Ekspozita “Dialog në errësirë” e Driton Hajredinit do të hapet në Poreç të Kroacisë

Krijuesi Driton Hajredini do të hapë ekspozitën personale, “Dialog në errësirë” në Poreç të Kroacisë.

Ekspozita do të hapet në Galerinë “Zuccato” më 31. 07. 2025, ku do të prezantohen 15 punime në pikturë, video dhe instalacione.

Driton Hajredini ka thënë për KALLXO.com se pikturat që do të ekspozohen trajtojnë kryesisht tema si migracioni, dëbimi dhe lëvizja e detyruar e popujve, duke i parë ato si “procese të dhimbshme, por edhe si rrëfim për qëndresën dhe shpresën”.

Ndërkaq, një pjesë e tyre, sipas tij, trajton vet artin e etabluar dhe konfrontimin e tij ndaj fenomeneve të artit në botë me një sarkazëm të lehtë.

“Instalacionet dhe videot ndërveprojnë me këto tema, duke ftuar vizitorët në një reflektim të thellë mbi kufijtë, kujtesën dhe identitetin” – ka thënë ai.

Hajredini, bashkëpunimin me këtë Galerinë “Zuccato” e filloi para rreth 5 viteve, kur ishte i ftuar të merrte pjesë në ekspozitën “Annale Porec”, një ngjarje artistike që organizohet prej vitit 1961 në Poreç të Kroacisë.

“Titulli i ekspozitës është i lidhur drejtpërdrejt me videon ‘Mëkati’, ku në errësirë, në një kënd rrëfimesh me një prift në Gjermani, zhvilloj një bisedë rreth sfidave që po kalon Kosova. Errësira këtu nuk ka të bëjë vetëm me mungesën e dritës, por është një hapësirë reflektimi dhe introspeksioni – një vend ku fjala dhe rrëfimi marrin peshë dhe thellësi tjetër”- ka pohuar ai.

Kështu, shton më tej Hajredini “Dialog në errësirë” bëhet simbol i ballafaqimit me të vërtetat, mëkatet dhe sfidat që na shoqërojnë si individë dhe si shoqëri.

Kurimi i ekspozitës , “Dialog në errësirë” është bërë nga Andi Bançiç dhe Seb Vojvoda.

Ekspozita “Dialog në errësirë” do të qëndrojë e hapur deri më 30. 08. 2025 në Galerinë “Zuccato” në Poreç të Kroacisë.

Driton Hajredini ka studiuar për art në Prishtinë dhe Gjermani. Krijimtaria e tij fokusohet në pikturë, video artit, instalacioneve, fotografisë dhe filmit. Puna e tij është ekspozuar në vende të ndryshme anembanë botës, nga ekspozita personale deri te festivale filmi. Përmes krijimtarisë së tij, Hajredini eksploron tema që lidhen me kufijtë, refugjatët, mërgimin, luftën dhe izolimin.