SHBA-ja ul normat e interesit për herë të parë pas katër vjetësh

Banka qendrore e Shteteve të Bashkuara të Amerikës ka ulur normat e interesit për herë të parë pas më shumë se katër vjetësh me një ulje më të madhe se zakonisht, raporton BBC.

Rezerva Federale ka reduktuar cakun për normën kryesore të huamarrjes për 0.5 për qind të pikëve, duke e zbritur në 4.75 dhe 5 për qind.

Jerome Powell, shef i Rezervës Federale, ka thënë se ky ishte një hap “i fortë”, porse ishte i nevojshëm për shkak të ngritjes së çmimeve dhe rritjes së shqetësimeve në tregun e punës.

Do të jetë një lehtësim për huamarrësit amerikanë, të cilët po përballeshin me normat më të larta të interesit në dy dekadat e fundit.

Ulja e së mërkurës (18.09.2024) ishte më e lartë se shumë analistë kishin parashikuar një javë më parë, dhe Rezerva ka lënë të kuptohet se përqindja e uljes së normës së interesit mund të bjerë akoma deri në fund të vitit.

Powell ka thënë se veprimi agresiv ka për qëllim të sigurojë se kostot e larta të huamarrjes për shkak të inflacionit të mos e dëmtojnë ekonominë e Shteteve të Bashkuara të Amerikës.

“Tregu i punës është në një pozitë të fortë – duam që ta mbajmë në këtë gjendje”, ka thënë Powell. “Kjo është çfarë po bëjmë”.

Vendimi i Rezervës Federale amerikane pason vendimet për ulje të bankave tjera qendrore, përfshirë ato në Bashkimin Evropian, Britani dhe Kanada, ku ishin pritur uljet e normave të interesit.

BQE-ja ka ulur normën e saj të depozitave për 25 pikë në 3.5 për qind.

Por BQE-ja, bankë qendrore për 20 vende që përdorin euron, nuk ka lejuar t’i dalë asgjë nga dora.

“Ne nuk po angazhohemi paraprakisht për një shteg të caktuar normash”, ka thënë  presidentja e BQE-së, Christine Lagarde në një konferencë për shtyp, duke përdorur formulën standarde të bankës për atë që ajo e quan politikë “e varur nga të dhënat”.

Përgatiti: Rexhep Maloku – Kallxo.com