Nis Samiti i Berlinit, Thaçi kërkon vendime të guximshme në rajon dhe BE

Presidenti i Kosovës, Hashim Thaçi ka mbajtur fjalimin në hapjen e Samitit të Berlinit ku po diskutohen edhe çështja e marrëdhënieve Kosovë-Serbi.

Thaçi ka njoftuar se në fjalimin e tij ka kërkuar që nga ky takim të mos dalin vetëm deklarata abstrakte

“Situata dhe relacionet janë në nivel të ulët, prandaj në rrethana të tilla shumë iniciativa të mira nga Procesi i Berlinit kanë mbetur pa u realizuar. Kjo situatë e keqe nuk mund të tejkalohet vetëm me deklarata dhe premtime abstrakte. Duhen vendime të guximshme nga shtetet e rajonit, të cilat nuk do të ndodhin për aq kohë sa nuk ka vendime të guximshme dhe strategjike nga Bashkimi Evropian dhe shtetet anëtare”, tha ai.

Ai shtoi se njëri ndër vendimet e para të BE-së duhet të jetë liberalizimi i vizave për Kosovën.

“Edhe pajtimi do të jetë i pamundur për aq kohë sa Serbia dhe Bosnje e Hercegovina nuk e njohin pavarësinë e Kosovës. Gjermania dhe Franca kanë mundësi ta marrin lidershipin për këto vendime të guximshme. Por, një prej vendimeve të para që Bashkimi Evropian do duhej ta merrte është liberalizimi i vizave për qytetarët tanë. Kosova padrejtësisht ka mbetur vendi më i izoluar në Evropë. Qytetarët e Kosovës janë populli më proevropian në rajon dhe është shumë e padrejtë të vazhdojnë të diskriminohen”, përfundoi ai.

Në Samitin e BE-së po marrin pjesë Presidenti, Hashim Thaçi, Kryeministri, Ramush Haradinaj dhe Ministri i Punëve të Jashtme, Behgjet Pacolli.

Takimi është organizuar nga kancelarja gjermane Angela Merkel dhe presidenti francez Emmanuel Macron.