Zyrtari i IHMK-së: Reshjet e fundit të shiut Prishtinë, më të dendura se në kushte normale

Mëngjesin e sotëm (20.05.2024) për shkak të reshjeve të shiut, janë bllokuar disa rrugë dhe janë shkaktuar dëme materiale në kryeqytet.

Në lidhje me situatën me reshjet, Bashkim Kastrati nga Instituti Hidrometeorologjik i Kosovës (IHMK), tha për KALLXO.com se vlera e reshjeve është më e lartë se zakonisht.

“Sot ka rënë rreth 26 milimetër ose 26 litra për metër katrorë, faktikisht po i bie që brenda 6 orëve të bien rreth 26 litra (reshje shiu), faktikisht kanë potencial me shkaktu vërshime të shpejta në zona të caktuara”- tha ai.

Ai ka folur edhe për reshjet në zona tjera të vendit.

“Reshjet me një intensitet më të lartë kanë filliuar në ditën e sotme të datës 20. 05.2024 në orën 02:00 të mëngjesit dhe ka përfshirë pjesën veriore dhe veri-lindore, gjegjësisht edhe pak pjesën qëndrore të Kosovës, por me intensitet të ndryshëm, prej intensitetit më të ulët deri te intensiteti më i lartë, por në pjesë të tjera të Kosovës ka qenë me reshje të ulëta ose fare pa reshje”- tha Kastrati për KALLXO.com

Megjithatë sipas Kastratit, lumenjtë kryesorë të vendit janë në gjendje normale dhe nuk ka rrezik për dalje nga shtrati.

“Lumenjtë kryesorë të Kosovës janë krejtësisht në kuota normale, nuk kemi ngritje apo dalje prej shtretërve të lumenjve”- ka deklaruar zyrtari i IHMK-së.

Ai  tutje thotë se në bazë të të dhënave që ka deri më tani IHMK-ja, edhe ditëve në vijim pritet të ketë reshje të shiut në Prishtinë, por jo me përmasa të mëdha.

“Natyrisht që do të ketë edhe ditëve në vijim reshje, por nuk e besojmë se do të ketë me përmasa të tilla që të përfshijnë një territor më të madh, por reshje do të ketë natyrisht”- ka shtuar Kastrati.

KALLXO.com ka raportuar nga vendi i ngjarjes për pasojat e vërshimeve në Prishtinë: