VIDEO - PSD akuzon Vetëvendosjen se po i manipulon nxënësit e gjimnazit ‘të rrezikshëm’ në Prishtinë
Zyrtarë të komunës së Prishtinës kanë dalë para gazetarëve për ta dhënë versionin e tyre rreth gjendjes së ndërtesës së gjimnazit “Ahmet Gashi” për të cilin sot nxënësit dolën në protestë.
Drejtorja e Arsimit në komunën e Prishtinës, Shpresa Shala, tha se është një vlerësim i ekspertëve se ndërtesa e gjimnazit e cila më parë ka qenë ‘shkollë teknike’ nuk i plotëson kushtet për mbajtje të mësimit në të.
“Në muajin gusht, ne si Drejtori e Arsimit kemi lëshuar një vendim për dislokimin e nxënësve të gjimnazit “Ahmet Gashi” në dy shkolla, klasa e 10-të do të kalojë në shkollën “Emin Duraku” dhe klasët 11 dhe 12 në shkollën “Sami Frashëri”< tha drejtorja Shpresa Shala.
“E gjithë kjo për shkak që është bërë një vlerësim i stabilitetit të ndërtesës dhe kushteve të mbajtjes së mësimit dhe kjo ndërtesë nuk i plotëson kushtet. Është gjendje emergjente, është në pyetje siguria e nxënësve dhe kemi marrë vendim që fëmijët përkohësisht të zhvendosen”, shtoi ajo.
Shala tha se janë marrë vesh me Këshillin e Prindërve që nga e hëna mësimi të vazhdojë në shkollat e caktuara për t’u zhvendosur.
Por ajo mohoi mundësinë që lokacionit të shkollës t’i ndryshohet destinimi.
https://kallxo.com/lajm/proteste-kunder-rrenimit-te-objektit-te-gjimnazit-ahmet-gashi-ne-prishtine/
“Nuk do të bëhet qendër tregtare aty, do të ndërtohet shkollë”, tha ajo
Ndërsa asamblisti i PSD-së në Asamblenë Komunale të Prishtinës, Adrian Berisha, akuzoi Vetëvendosjen se qëndron prapa kësaj proteste.
“Është shumë e dhimbshme qysh manipulohen qytetarët duke rrezikuar jetën e nxënësve. Është raport i inxhinierëve i cili thotë që shkolla nuk i plotëson kushtet. Ka fakte shumica e pjesëmarrësve, komplet protesta ka qenë e organizuar nga një parti politike. Kam fakte që Vetëvendosje po manipulon me nxënës”, tha Adrian Berisha.
