Ushtritë e NATO-s të papërgatitura për luftëra dronësh - paralajmëron Komandanti i Ukrainës

Forcat e armatosura të NATO-s nuk janë të gatshme për një luftë moderne dronësh – ka deklaruar Komandanti ukrainas në krye të Sistemeve të pajisjeve pa personel, tri vjet pas konfliktit me Rusinë, ku të dy palët po mundohen ta bëjnë dallimin nëpërmjet fuqisë teknologjike – raporton të mërkurën Agjencia e lajmeve Reuters.

Kievi po mundohet fort që të jetë më lart se armiku duke përfshirë Inteligjencën Artificiale, dërgimin e më shumë dronëve tokësorë dhe duke testuar laserë për të rrëzuar pajisjet pa personel të Rusisë – ka deklaruar kolonel Vadym Sukharevskyi, drejtues i Forcave të Sistemeve pa Personel të Ukrainës.

Duke folur në Zyrën e rinovuar për këto forca, por që Reutersit i është kërkuar që të mos e raportojë lokacionin, Sukharevskyi ka folur për avancimet që janë bërë dhe për ndikimin e dronëve prej se ka nisur pushtimi rus, më 2022. Ai ka thënë se dronët kanë përmbysur edhe doktrinat e mëhershme të luftës.

“Nga çfarë kam parë dhe dëgjuar, asnjë ushtri e NATO-s nuk është gati për t’i rezistuar llojeve të shumta të dronëve.” – ka deklaruar Sukharevskyi, në një intervistë të realizuar së fundmi.

Ai ka thënë se NATO-ja duhet ta pranojë epërsinë ekonomike të dronëve që shpesh kushtojnë shumë më lirë, sesa të prodhosh armatim konvencional që kërkohet për rrëzimin e tyre.

“Është matematikë elementare. Sa kushton një raketë që e qëllon një (dron rus) Shahed? Dhe, sa kushton dërgimi i një anije, aeroplani dhe një sistemi ajror për ta hedhur atë?”

Dronët me rreze të gjatë veprimi mund të kushtojnë disa mijëra dollarë për dronët më të thjeshtë, derisa dronët sulmues “Shahed” llogaritet se kushtojnë dhjetëra-mijëra dollarë. Raketat e mbrojtjes ajrore kapin vlera gjashtë ose shtatëshifrore dhe shumë vende kanë vetëm stoqe të kufizuara – duke e bërë joekonomik përdorimin e tyre.

Komentet e Sukharevskyit vijnë në kohën kur disa anëtare të NATO-s në Europë kanë rritur theksueshëm shpenzimet e mbrojtjes, që të përgatiten për luftë, në rast se përshkallëzohet lufta e Ukrainës. Me përkrahjen amerikane për Ukrainën dhe Europën që po lëkundet janë intensifikuar edhe përpjekjet.

Prej pushtimit të Ukrainës nga Rusia më 2022 ka pasur përdorim theksueshëm të rritur të dronëve.

Ukraina thotë se ka prodhuar 2.2 milionë dronë të vegjël FPV e 100 mijë dronë më të mëdhenj dhe me rreze më të gjatë veprimi më 2024. Rusia më parë kishte bërë të ditur se do të prodhonte 1.4 milionë dronë FPV, në të njëjtin vit.

“Aktualisht, edhe Komandanti i Forcave të Armatosura të Ukrainës thotë se më shumë se 60% e caqeve janë shkatërruar prej dronëve.” – ka thënë Sukharevskyi.

“Çështja e vetme është sesi do të zhvillohen taktikat e përdorimit të tyre dhe pastaj aspekti teknologjik.”

Përgatiti: Rexhep Maloku – Kallxo.com