U rrah me shufër metalike duke dërguar vajzën në kopsht, një muaj paraburgim për dy të dyshuarit

Gjykata e Mitrovicës ka caktuar një muaj paraburgim ndaj dy të dyshuarve për disa vepra penale, për njërin prej tyre edhe për sulm ndaj një personi në Vushtrri.

“…për shkak të dyshimit të bazuar se kanë kryer veprat penale “Mbajtja në pronësi, kontroll ose posedim të paautorizuar të armëve“, dhe “Përdorimi i armës apo mjetit të rrezikshëm“, ndërkaq K.M., dyshohet edhe për veprën penale “Lëndimi i rëndë trupor“”- thuhet në njoftimin e Sistemit Prokurorial më 05.09.2025.

Sipas njoftimit, më 20.05.2025 rreth orës 08:55 minuta në Vushtrri, në parkingun e një kopshti fëmijësh, i pandehuri K.M., bashkë edhe me persona të tjerë, me dashje dhe në bashkëveprim me njëri-tjetrin me anë të shufrës metalike, i kanë shkaktuar lëndime të rënda trupore të dëmtuarit L.O.

Në dosjen e Prokurorisë thuhet se në momentin që i dëmtuari ka dalë nga automjeti për ta dërguar vajzën në kopsht, e kanë goditur në kokë, këmbë dhe pjesë të ndryshme të trupit, dhe pastaj janë larguar në drejtim të panjohur me motoçikleta.

Po ashtu, të dyshuarve K.M. dhe K.M., gjatë kontrollit në shtëpinë e tyre në fshatin Ropicë të Vushtrrisë u janë gjetur elektroshok, sprej dhe telefona.

Prokuroria përshkruan se gjatë kontrollit janë gjetur një numër i madh i armëve, armë të gjata, armë të shkurta, armë me silenciatorë, snajperë, pistoleta, sasi e konsiderueshme e municionit. Gjithashtu, Prokuroria në njoftim ka potencuar se gjatë shikimit të telefonave janë parë video ku të njëjtit janë parë duke gjuajtur me armë.

Madje, sipas njoftimit, në një nga fotot e nxjerra nga njëri i pandehur shihen duke shënjestruar me anë të revoles automjetin e policisë nga automjeti i tij.