Transportonin 10 kilogramë kanabis - kapen në flagrancë dy persona në Shqipëri
Policia e Shtetit në Shqipëri ka njoftuar për një operacion policor të koduar si “Aksi”.
Në kuadër të këtij operacioni janë sekuestruar 10 kilogramë të dyshuar si lëndë narkotike kanabis sativa, një armë gjahu pa leje, një automjet dhe tre telefonë celularë.
“Vihen në pranga 2 shtetas që u kapën në flagrancë, në aksin rrugor “Nikël–Fushë Krujë”, duke transportuar lëndën narkotike me qëllim shitjen – ka njoftuar Policia e Shtetit.
Sh.H 34 vjeçar dhe I.T 43 vjeçar janë të arrestuarit në kuadër të këtij aksioni.
Të dy u kapën duke transportuar lëndën e dyshuar narkotike me automjetin “Volksëagen”, në të cilin gjendeshin dy thasë të dyshuar me kanabis, me peshë totale prej 10 kilogramëve.
“Më tej, gjatë kontrollit të banesës së 34-vjeçar iu gjet një armë gjahu, pa leje, e cila u sekuestrua në cilësinë e provës materiale bashkë me lëndën narkotike, automjetin dhe 3 celularë. Materialet procedurale i kaluan Prokurorisë, për veprime të mëtejshme”- ka njoftuar Policia.
