Të dhënat e Policisë për rastet e dyshuara të manipulimeve me vota në ditën e zgjedhjeve
Ditën e mbajtjes së zgjedhjeve lokale në Kosovë (12.10.2025), janë raportuar disa raste të manipulimeve me vota në disa prej komunave të vendit.
Në Graçanicë, Policia ka arrestuar një burrë pasi dyshohet se kishte fotografuar fletën e votimit.
Sipas Policisë, i arrestuari ka deklaruar se për këtë i janë ofruar 50 euro.
Policia bën të ditur se me vendim të prokurorit, ky i dyshuar është dërguar në mbajtje.
Në komunën e Kllokotit, Policia njofton se një grua ka lëshuar raporte mjekësore për asistencë gjatë procesit të votimit.
E dyshuara thuhet se është intervistuar në prezencën e avokatit mbrojtës me dyshimin që ka kryer vepër penale.
“Veprimet e mëtejshme hetimore janë ndërmarr në koordinim me Prokurorin e Shtetit, përderisa rasti vazhdon të trajtohet në procedurë të rregullt”- njofton Policia, sot më 13.10.2025.
Ndërsa, dy burra në Prizren janë shoqëruar në stacion policor, njëri për dhënie të ryshfetit, tjetri për marrje të ryshfetit të një shume prej 120 euro në mënyrë që të votohet personi i caktuar.
“Me vendim të prokurorit pas intervistimit palët janë liruar në procedurë të rregullt”- thuhet në raport policor.
Po ashtu në Istog raportohet se është arrestuar një person nën dyshimin se ka marrë 10 euro ryshfet që të votojë një person të caktuar.
Me vendim të prokurorit, i dyshuari thuhet se është liruar dhe se rasti shkon në procedurë të rregullt.
Një person tjetër është arrestuar në Mitrovicë pasi dyshohet se ka fotografuar votën e tij.
Policia njofton se ky i dyshuar është intervistuar dhe më pas me urdhër të prokurorit është liruar në procedure të rregullt.
Rezultatet preliminare të zgjedhjeve lokale në Kosovë, sipas KQZ-së mund t’i gjeni në këtë LINK.
Sipas të dhënave të KQZ-së, dalja në zgjedhje e qytetarëve me të drejtë vote në Kosovë është 48,12%.
