Skenderaj, polici në rroba civile parandalon një mosmarrëveshje – konfiskon armë zjarri
Policia e Kosovës ka njoftuar se me 12.08.2025 se pas një mosmarrëveshje mes qytetarëve në fshatin Abri të Skenderajt, e ka arrestuar një person të dyshuar, pasi i njëjti kishte ekspozuar një armë zjarri dhe ka rrezikuar sigurinë e qytetarëve përreth.
Sipas Policisë, zyrtari policor ka qenë jashtë orarit të punës dhe me veprimin profesional të tij të dyshuarit ia ka konfiskuar armën e zjarrit dhe në vendngjarje e ka arrestuar atë.
“Një zyrtar policor jashtë orarit në rroba civile ka ndërhyrë për të parandaluar një mosmarrëveshjeje mes disa personave në fshatin Abri të Skenderajt, ku njëri nga të dyshuarit kishte ekspozuar një armë zjarri, duke rrezikuar sigurinë e qytetarëve përreth. Polici, duke vepruar me profesionalizëm, ka arritur që në vendngjarje të arrestojë personin e dyshuar dhe t’i konfiskojë armën” – thuhet në njoftimin e Policisë.
Policia thekson se pas arrestimit, i dyshuari është shoqëruar në stacionin policor për procedura të mëtejme hetimore, ndërsa arma e llojit pistoletë është konfiskuar si provë materiale.
Lidhur me ngjarjen, PK-ja sqaron se janë iniciuar raste për dy vepra penale, “Armëmbajtë pa leje” dhe Kanosje”, ndërsa me vendim të prokurorit, të dyshuarit i është caktuar masa e ndalimit policor prej 48 orësh.
