Shpërthen gypi i kanalizimit në Klinikën e Pediatrisë, SHSKUK: Nuk ka pasur depërtim të ujërave në dhomat ku po trajtohen fëmijët

Në një nga hapësirat e korridorit të një reparti të Klinikës së Pediatrisë në QKUK, në mesnatë ka shpërthyer një gyp i kanalizimit.

Shërbimi Spitalor Klinik Universitar i Kosovës përmes një njoftimi më 25.08.2025 ka thënë se situata është vënë nën kontroll.

“Nuk ka pasur depërtim të ujërave në dhomat ku po trajtohen fëmijët”- theksohet në njoftim.

SHSKUK ka bërë të ditur se “korridoret janë pastruar dhe  pritet të kryhet procesi i dezinfektimit, deratizimit dhe dezinsektimit (DDD), me qëllim që të garantohet higjiena dhe siguria e ambientit spitalor”.