SHBA qorton Rusinë për nxitje frike për Luftë të Tretë Botërore pas komentit të Trumpit për "lojën me zjarrin"

I dërguari i presidentit amerikan Donald Trump Keith Kellogg ka qortuar të mërkurën, më 28.05.2025, një zyrtar të lartë rus për nxitje të frikës nga Lufta e Tretë Botërore, pasi Trump paralajmëroi homologun Vladimir Putin se po “luante me zjarrin” për Ukrainën – raporton Reuters.

Ndërsa forcat ruse po përparojnë në Ukrainë Trump, në një postim në Truth Social, ka shkruar se Putin po luan me zjarrin dhe ka paralajmëruar se gjëra “përnjëmend shumë të këqija” do t’i kishin ndodhur tashmë Rusisë, nëse ai nuk do të ishte në krye të Shtëpisë së Bardhë.

“Ajo që Vladimir Putin nuk e kupton është se nëse nuk do të ishte për mua shumë gjëra vërtet të këqija do të kishin ndodhur tashmë në Rusi dhe dua të them shumë të këqija. Ai po luan me zjarrin.” – ka shkruar Trump në një postim në Truth Social të martën – sipas kohës lokale amerikane.

Zyrtari i lartë i Sigurisë ruse Dmitry Medvedev, ish-President, i ka hedhur poshtë kritikat e Trumpit. “Lidhur me fjalët e Trumpit rreth ‘lojës me zjarrin’ të Putinit dhe ‘gjërave vërtet të këqija’ që i ndodhin Rusisë, unë di vetëm një gjë vërtetë të keqe: Lufta e Tretë Botërore. Shpresoj që Trump ta kuptojë këtë!” – ka shkruar Medvedev në anglisht në platformën e mediave sociale X.

I dërguari i SHBA-së Kellogg ka cituar postimin e Medvedevit dhe e quajti të pamatur.

“Nxitja e frikës nga Lufta e Tretë Botërore është një koment i pafat dhe i pamatur dhe i papërshtatshëm për një fuqi botërore.” – tha Kellogg në X.

Ai ka theksuar se presidenti Trump po punon “për të ndaluar këtë luftë dhe për t’i dhënë fund vrasjeve”.

Përgatiti: Rexhep Maloku – KALLXO.com