Reuters: Zyrtarët amerikanë e rusë gjatë bisedimeve për paqe në Ukrainë diskutuan edhe ujdi për energji

Zyrtarë qeveritarë të Shteteve të Bashkuara të Amerikës dhe të Rusisë kanë diskutuar disa ujdi për energji gjatë negociatave të këtij muaji ku u provua të arrihej një marrëveshje e paqes në Ukrainë, kanë bërë të ditur pesë burime të informata me bisedimet, ka raportuar të martën, më 26.08.2025, ekskluzivisht agjencia e lajmeve, Reuters.

Këto ujdi janë propozuar si stimuj për ta inkurajuar Krmelinin që të pajtohet për paqe në Ukrainë dhe që Uashingtoni të zbusë sanksionet ndaj Rusisë, kanë thënë burimet.

Rusisë i janë ndaluar shumica e investimeve ndërkombëtare në sektorin e saj të energjisë dhe arritja e marrëveshjeve të rëndësishme për shkak të sanksioneve pas pushtimit të Ukrainës që nisi në shkurtin e vitit 2022.

Zyrtarët diskutuan mundësinë e rifutjes së Exxon Mobilit në projektin rus të gazit dhe naftës, Sakhalin-1, kanë thënë tri burime.

Ata kanë ngritur mundësinë e blerjes ruse të pajisjeve amerikane për projektet e gazit të lëngshëm natyror, si Arktik LNG-2, që është nën sanksionet perëndimore, kanë thënë katër burime.

Asnjë nga burimet nuk mund të identifikohet sepse nuk ishin të autorizuara që të flisnin publikisht për negociatat.

Një tjetër ide ishte që SHBA-ja të blinte nëndetëse me energji bërthamore për thyerjen e akujve nga Rusia, ka raportuar Reuters më 15.08.2025.

Bisedimet janë zhvilluar gjatë vizitës së emisarit special amerikan, Steve Witkoff, në Moskë në fillim të muajit kur do të takohej me presidentin rus, Vladimir Putin, dhe emisarin e tij të investimeve, Kirill Dmitriev, kanë thënë tri burime. Ato ujdi janë diskutuar edhe brenda Shtëpisë së Bardhë me presidentin amerikan, Donald Trump, kanë thënë dy burime.

Përgatiti: Rexhep Maloku – Kallxo.com