Policia shqiptare jep detaje nga dhuna e mbrëmshme e tifozëve në Tiranë

Policia shqiptare në Tiranë ka bërë të ditur se mbrëmë janë shoqëruar në stacion policor 60 tifozë të huaj, 48 prej tyre italianë dhe 12 holandezë, pas incidenteve në rrugët e Tiranës.

Sonte në stadiumin ‘Air Albania’ në Tiranë zhvillohet finalja e ‘Conference League’, ku do të përballen Roma me Feynoordin.

Sipas policisë shqiptare, fillimisht është hasur një grup i tifozëve duke lëvizur ne drejtim të stadium dhe sipas informacioneve që kishte policia, tentonin të përplaseshin me një grup tifozës të skuadrës tjetër.

“Shërbimet e Policisë kanë tentuar t’i ndalojnë në rrugën “Mustafa Matohiti”, ku tifozët e skuadrës Feyenoord, në mënyrë të dhunshme kanë goditur punonjësit e Policisë me shishe qelqi, shkopinj, gurë dhe sende të tjera të forta. Më pas, një grup tjetër tifozësh, të skuadrës së Romës, kanë lëvizur në drejtim të urës së DVP Tiranë ku dhe atje janë përplasur me shërbimet e Policisë duke përdorur gurë, shishe e shkopinj”, thuhet në njoftim.

Tutje, policia shqiptare ka bërë thirrje që të shmangen veprimet e dhunshme, që nuk kanë lidhje me sportin, si dhe kanë thënë se është e vendosur për të garantuar rendin dhe sigurinë.

“ Policia e Shtetit kërkon mirëkuptimin e qytetarëve që të mos provokohen nga individë apo grupe tifozësh që mund të jenë nën efektin e alkoolit dhe të njoftojnë menjëherë në 112 dhe Komisariatin Dixhital çdo tentativë të prishjes së rendit dhe sigurisë”, ka bërë thirrje në fund Policia shqiptare.

Televizioni ‘TopChannel’ ka publikuar mbrëmë pamje të dhunës ndërmjet tifozëve, në të cilat shihet një person i shtrirë në tokë dhe i dëmtuar rëndë.