Policia jep detaje për të shtënat me armë dhe aksidentin në Vranjevc

Një incident është regjistruar në rrugën “Fahri Fazliu” në lagjen Kodra e Trimave (Vranjevc) të Prishtinës.

Sipas organeve të rendit, më 10.10.2025, rreth orës 12:00, zyrtarët policorë kanë tentuar të ndalojnë personin e kërkuar L.K, i lindur në vitin 1996, derisa i njëjti ishte në një veturë në rrugën “Fahri Fazliu”.

Policia njofton se i dyshuari ka refuzuar urdhrat policorë dhe ka arritur të largohet duke rrezikuar zyrtarët policorë. Në njoftim thuhet se njëri nga policët, në përpjekje për ta ndaluar të dyshuarin ka përdorur edhe armën zyrtare.

Personi i dyshuar ka arritur të largohet duke shkaktuar një aksident trafiku me të lënduar dhe dëme materiale.

“Lidhur me rastin janë njoftuar institucionet kompetente”- thuhet në njoftimin e zëdhënësit të Policisë së Kosovës për rajonin e Prishtinës

Pas incidentit, ekipi i KALLXO.com ka raportuar nga vendi i ngjarjes. Më poshtë ju sjell edhe fotografinë e gëzhojave në rrugë, nga arma që është shkrepur nga zyrtari policor, në përpjekje për ta ndalur të dyshuarin.