Parullat në Lipjan për vdekjen e Agon Zejnullahut| Foto: Kolektivi për Mendim dhe Veprim Feminist
‘Policia e Kosovës të ndrydh deri sa të vret’, parullat e Kolektivit për Mendim dhe Veprim Feminist pas vdekjes së Agon Zejnullahut
“Poshtë brutaliteti policor” është mbishkrimi i vendosur në oborrin e stacionit policor në Lipjan sonte në mbrëmje, më 08.07.2025.
E shënime të ngjajshme shihen edhe rrugëve të këtij qyteti, e të cilat lidhen me një ngjarje të rëndë që ka tronditur opinionin që ka ndodhur më 07.07.2025 pak minuta pas mesnatës, ku një person ka ndërruar jetë në Lipjan derisa ishte duke u arrestuar nga disa policë të Kosovës.
Kolektivi për Mendim dhe Veprim Feminist e ka cilësuar si vrasje, brutalitet policor e dehumanizëm ngjarjen e datës 7 korrik.
“Brutaliteti policor që e la pa frymë Agonin nuk ishte shpërdorim i izoluar i forcës dhe pushtetit, por një normë e cila e përshkon raportin që institucioni i policisë ka krijuar me civilët/et. Brutaliteti është qenësor në ekzistencën dhe funksionin e policisë”- thuhet në reagimin e Kolektivit.
OJQ thot se Policia si institucion ka dëshmuar se është shpesh dhunues ndaj atyre që kërkojnë ndihmë, grupeve më të cenueshme shoqërore dhe atyre që u kundërvihen padrejtësive shtetërore.
“Ndonëse konteksti historik i krijimit të policisë shtetërore të pavarur nga kolonializmi dhe okupimi jugosllavo-serb e ka ndërtuar një raport specifik të shoqërisë tonë me policinë, ajo nuk e ka tjetërsuar funksionin e saj kyç -ruajtja e interesave të klasës sunduese përmes forcës”- theksohet më tej në reagim.
Rasti që sipas tyre e e pasqyron natyrën e dhunshme të Policisë është moment kritik për ndërgjegjen kolektive.
E për këtë ngjarje, organizata kërkon drejtësi.
“Vrasja e tij, tashmë e regjistruar edhe vizualisht në kujtesën tonë, duhet të na bëjë të lëvizim, të organizohemi dhe t’i kundërvihemi dhunës e cila asnjëherë nuk është e rastësishme dhe e izoluar. Thërrasim në mobilizim shoqëror për siguri të gjithësecilës e secilit prej nesh, dhe për të kërkuar drejtësi post-mortum për Agonin”- thekson Kolektivi për Mendim dhe Veprim Feminist.
27-vjeçari Agon Zejnullahu vdiq gjatë përpjekjes së policëve për ta arrestuar atë.
Pesë zyrtarë policorë janë arrestuar lidhur me rastin.
