Përleshje mes dy personave në Drenas, njëri tentoi t’i vërë flakën veturës së tjetrit

Një mosmarrëveshje mes dy personave në Drenas ka përfunduar me lëndime trupore dhe arrestim.

Policia e Kosovës ka njoftuar se rasti ka ndodhur mbrëmë më 07.09.2025, rreth orës 18:30, kur një i dyshuar ka tentuar t’i vërë flakën veturës së viktimës.

“Është arrestuar i dyshuari kosovar pasi që i njëjti, pas një mosmarrëveshje dhe përleshje me viktimën mashkull kosovar, ka tentuar t’ia vejë flakën veturës të cilën e drejtonte viktima” – thuhet në raportin 24-orësh të Policisë.

Nga përleshja, sipas Policisë, lëndime kanë pësuar të dy – si viktima ashtu edhe i dyshuari. Të dy janë dërguar për tretman mjekësor në QKUK.

“Me vendim të prokurorit, i dyshuari pas tretmanit mjekësor është dërguar në mbajtje” – ka bërë të ditur Policia.